ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓެއްގެ ކުޑަ ދޮރުން ކުޑަ ކުއްޖަކު ސިޑިގޮޅިއަށް ފައިބާ މަންޒަރު ފެންނަ ވީޑިއޯއެއް މީސް މީޑިޔާގައި އާންމު އެކަން ހިނގި ގޮތް ބަލަމުން އަންނަކަން ފުލުހުން ހާމަކޮށްފިއެވެ.
އިއްޔެގެ ވަގުތެއްގައި މީސް މީޑިޔާގައި އާންމުވި ވީޑިޔޯއަކުން ފެންނަ ގޮތުގައި ހުޅުމާލެއަށް ވައިބާރުވި ވަގުތެއްގައި ހިޔަ ސަރަހައްދުގައި ހިމެނޭ ރަތް ފެލްޓްތަކުން (ފްލެޓް:13 ، 14 ، 15، 16) އެއް ފްލެޓްގެ ކުޑަ އަންހެން ކުއްޖަކު ކުޑަދޮރުން ނުކުމެ، އެތަނުގައި ހަދާފައިވާ ޝީޓުގެ މައްޗަށް ނުކުމެގޮސް، ސިޑިގޮޅިއަށް ފައިބަން އުޅޭ މަންޒަރު ފެނެއެވެ.
ވީޑިއޯއިން ފެންނަ ގޮތުގައި އެއީ ރަތް ޓަވަރެއްގެ ފުރަތަމަ ފަންގިފިލާއެވެ.
މިކަމާއި ގުޅިގެން ފުލުހުން ވިދާޅުވީ، އެ ވީޑިއޯއިން ފެނިގެން ދަނީ ނުވަ އަހަރުގެ އަންހެން ކުއްޖެއް ކަމަށާއި އެކަން ހިނގި ގޮތް ހުޅުމާލެ ފުލުހުންނާއި އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބަލަމުންދާ ކަމަށެވެ.
މި ވީޑިއޯ މީސްމީޑިއާގައި އާންމުވާން ފެށުމާއި އެކީ ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. އެގޮތުން ގިނަ ބަޔަކު ވަނީ މިއީ އެ ކުއްޖާއަށް ބޮޑު އަނިޔާއެއް ލިބިދާނެ ފަދަ ކަމެއް ކަމަށް ބުނެފައެވެ.
