ދިވެހިރާއްޖޭގެ ވަޒީފާގެ ބާޒާރަށް ބޭނުންވާނޭ ހުނަރުތައް ދެނެގަތުމަށްޓަކައި ދިރާސާއެއް ކުރަން ފަށައިފައިވާކަމަށް ހަޔާ އެޑިއުކޭޝަން މިނިސްޓަރު މަރްޔަމް މާރިޔާ ވިދާޅުވެއްޖެއެވެ.
މިއަދު ހަޔާ އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓާރ މާރިޔާ ވިދާޅުވީ ކެރިއާ ގައިޑެންސް ދެވޭނެ ގޮތް ހަމަޖެއްސުމުގެ ވިސްނުން ނެޝަނަލް ޖޮބް ސެންޓަރުން ގެންގުޅުއްވާ ކަމަށެވެ.
ކުރީ ސަރުކާރުން ވަޒީފާ ހޯދާ ފަރާތްތަކަށް ފަސޭހަކަމާއެކު ބޭނުންކޮށް، ރާއްޖޭގެ އެކި ކަންކަޅުތަކުގައި ލިބެންހުރި ވަޒީފާތަކުގެ މަޢުލޫމާތު ޝާއިޢުކުރެވޭ ޕްލެޓްފޯމެއްގެ ގޮތުގައި ނޭޝަނަލް ޖޮބް ސެންޓާރ އެކުލަވާލާފައިވާއިރު، ސަރުކާރު ބަދަލުވީ އިރު، ނޭޝަނަލް ޖޮބް ސެންޓަރަކީ ހަމައެކަނި ވަޒީފާދޭ ފަރާތާއި ވަޒީފާ ބޭނުންވާ ފަރާތް ގުޅުވައިދޭ ތަނެއްކަމަށް މިނިސްޓަރު ވިދާޅުވިއެވެ.
މިނިސްޓަރު މާރިޔާ ވިދާޅުވި ގޮތުގައި އެބޭފުޅުންގެ އަމާޒަކީ ވަޒީފާ ބޭނުންވާ މީހުންނަށް ބޭނުންވާ ހުނަރުތައް ދެނެގަނެ އެ ހުނަރުތައް ދަސްކޮށްދިނުމާއި ވަޒީފާ ހޯދައިދިނުމަށް މަސައްކަތް ކޮށްދިނުމެވެ.
މީގެ އިތުރުން އެފަދައިން ކުރުމަށް އެކަށީގެންވާ ގޮތެއްގައި މަސައްކަތް ކުރެވޭނީ އެކަމަށް ބޭނުންވާ މަޢުލޫމާތުތައް އެއްކޮށްގެން ކަމަށާއި ވޯލްޑް ބެންކްގެ އެހީގައި އަމިއްލަ ފަރާތަކުން ދިރާސާއެއް ފަށައިފައިވާ ކަމަށް ވެސް މާރިޔާ ވިދާޅުވިއެވެ.
މިއަހަރުގެ އޮގަސްޓު މަހުގެ ނިޔަލަށް އެ ދިރާސާގެ ނަތީޖާ ލިބޭނެ ކަމަށް އުންމީދު ކުރައްވައި ކަމަށް ވިދާޅުވެފައިވެއެވެ.
މިއަދުގެ ޕްރެސް ކޮންފްރެންސްގައި ވާހަކަފުޅު ދައްކަވަމުން މިނިސްޓާރ މާރިޔާ ވިދާޅުވެފައިވަނީ މިއަހަރުގެ އޮގަސްޓު މަހުގެ ނިޔަލަށް އެ ދިރާސާގެ ނަތީޖާ ލިބޭނެ ކަމަށް އުންމީދު ކުރައްވައި ކަމަށާއި މިދިރާސާގެ ނަތީޖާ ލިބުމަށްފަހު މިނިސްޓްރީން ތައުލީމަށް ކުރާ ހަރަދުތައް ކުރާނީ ދިރާސާގެ ނަތީޖާގެ މައްޗަށް ބިނާކޮށް ކަމަށެވެ.
