އެމްޑީޕީގެ ފަރާތުން ވިހިވަނަ މަޖިލީހުގައި ޕާލިމެންޓްރީ ގްރޫޕްގެ މަގާމުތަކަށް މެމްބަރުން އިންތިޚާބު ކޮށްފިއެވެ.
އެމްޑީޕީން އިއްޔެ ބުނީ އެ ޕާޓީން އިއްޔެ ބޭއްވި ޕާލަމެންޓްރީ ގްރޫޕްގެ އިންތިޚާބުގައި، އެ ޕާޓީގެ ޕީޖީ ލީޑަރަކަށް ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ހޮވިފައިވާކަމަށެވެ. އަދި ޑެޕިއުޓީ ޕީޖީ ލީޑަރުންގެ 2 މަޤާމަށް އައްޑޫ ސިޓީ މަރަދޫ ދާއިރާގެ އިންތިހާބީ މެންބަރު އަޙްމަދު ދީދީ (ޑީޑީ)އާއި ވައިކަރަދޫ ދާއިރާގެ އިންތިހާބީ މެންބަރު ޙުސައިން ޒިޔާދު އިންތިޚާބު ވެފައިވާކަމަށް ވެސް އެ ޕާޓީން ހާމަކުރިއެވެ.
އެމްޑީޕީއިން ޕާލިމެންޓްރީ ގްރޫޕްގެ ސެކްރެޓަރީ ޖެނެރަލްގެ މަޤާމަށް އިންތިޙާބު ކުރީ ގަލޮޅު އުތުރު ދާއިރާގެ އިންތިޙާބީ މެންބަރު މުޙައްމަދު އިބްރާހިމް (ކުޑޫ)އެވެ. ހަމައެހެންމެ ޕީޖީގެ ވިޕުންގެ ގޮތުގައި ކަނޑިތީމު ދާއިރާގެ އިންތިޙާބީ މެންބަރު އަމީން ފައިސަލާއި ކެޔޮދޫ ދާއިރާގެ އިންތިޙާބީ މެންބަރު މުޙައްމަދު ނިއުޝާދު ވަނީ ހަމަޖައްސާފައެވެ. މީގެއިތުރުން، ޑެޕިއުޓީ ސެކްރެޓަރީ ޖެނެރަލަށް އިންތިހާބު ކުރީ މާވަށު ދާއިރާގެ އިންތިހާބީ މެންބަރު އަހުމަދު ޝާކިރެވެ. އަދި ޗީފް ވިޕްގެ މަގާމަށް އިންތިހާބުކުރީ ތޮއްޑޫ ދާއިރާގެ އިންތިހާބީ މެންބަރު ހުސައިން ސަމީރެވެ.
މިދިޔަ މަހުގެ 21 ވަނަ ދުވަހު ބޭއްވި ރައްޔިތުންގެ މަޖިލިސް އިންތިޚާބުގައި އެމްޑީޕީއަށް ކާމިޔާބު ކުރެވުނީ 12 ގޮނޑިއެވެ. އެހެންކަމުން 20 ވަނަ މަޖިލީހުގައި އެމްޑީޕީގެ ޕީޖީ ލީޑަރު ހިތަދޫ ދެކުނު ދާއިރާގެ އިންތިހާބީ މެންބަރު އިބްރާހިމް ނާޒިލް ވެގެންދާނީ މަޖިލީހުގެ މައިނޯރިޓީ ލީޑަރަށެވެ.
