ރާއްޖޭގެ ޓޫރިޒަމް ކުރިއެރުވުމަށްޓަކައި ސަރުކާރުން ޗައިނާގެ އަލީބާބާގެ ޓްރެވެލް އޭޖެންސީ ‘ފްލިގީ’ އާ މަޝްވަރާ ކުރަން ފަށައިފިއެވެ.
ދުނިޔޭގެ އެންމެ ބޮޑު އީކޮމާސް ކުންފުނިތަކުގެ ތެރޭގައި ހިމެނޭ އަލީބާބާގެ ޓްރެވެލް އޭޖެންސީ ‘ފްލިގީ’ އާއިއެކު، މަޝްވަރާތައް ކުރަން ފަށާފައިވާކަން ޓޫރިޒަމް މިނިސްޓަރު އިބްރާހިމް ފައިސަލް އެކްސް މެދުވެރިކޮށް ހާމަކޮށްފައިވާއިރު، ޗައިނާގެ ހަންގްޖޯގައި ހުންނަ އަލީބާބާގެ މައި އޮފީހަށް މިއަދު ޒިޔާރާތް ކުރެއްވި ވާހަކަވެސް ދަންނަވާފައިވެއެވެ.
ކުރިއަށް އޮތްތަނުގައި ފްލިގާ އާއި ގުޅިގެން މަސައްކަތްކުރެވިދާނެ ކަމުގެ އުއްމީދު އޮތްކަމަށާއި ޓެކްނޮލޮޖީއާއި އީޖާދީ ސްޓްރެޓެޖީތައް ބޭނުންކޮށްގެން ރާއްޖޭގެ ފަތުރުވެރިކަން ކުރިއަރުވަން ރާއްޖެ އިޝްތިހާރު ކުރަން ތައްޔާރަށް ހުންނެވި ކަމަށް މިނިސްޓަރު ފައިސަލް ވިދާޅުވިއެވެ.
ދިވެހރާއްޖެއަށް އެންމެ ގިނައިން ފަތުރުވެރިން އަންނަ ގައުމަކީ ޗައިނާއިން ކަމަށްވެފައި ޗައިނާގައި ރާއްޖޭގެ ޓޫރިޒަމް މާރކެޓް ބޮޑުކުރަން ސަރުކާރުންވެސް ދަނީ ގިނަގުނަ މަސައްކަތްތަކެއް ކުރަމުންނެވެ. އެގޮތުން ބަލާއިރު، ވެއިޒިންޕޭ ނުވަތަ ވީޗެޓްޕޭ ތައާރަފުކުރަން ރާއްޖޭގެ ފަތުރުވެރިކަމުގެ ވިޔަފާރިތަކަށް ތަޢާރަފް ކުރުމަށް މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)އާއި އެ ކުންފުންޏާ ދެމެދު އެއްބަސްވުމެއްގައި ސޮއެ ކުރެވިފައިވެއެވެ.
މިދިޔަ ހޯމަ ދުވަހާއި ހަމައަށް ޗައިނާއިން 98،908 ފަތުރުވެރިން އައިސްފައިވާކަމަށް އިއްޔެ ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތަކުން ވެސް ދައްކައެވެ.
