ޓެކްސީ ޑްރައިވަރުންގެ ދަފްތަރުގައި މިހާތަނަށް 175 ޑްރައިވަރަކު ރަޖިސްޓްރީ ކޮށްފައިވާކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެއެވެ.
އިއްޔެ ޓްރާންސްޕޯޓް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން އަމީން ވިދާޅުވީ ޓެކްސީ ޑްރައިވަރުންގެ ދަފްތަރެއް އެކުލަވާލުމަކީ ރައީސް ޑރ. މުޙައްމަދު މުއިއްޒުގެ ވެރިކަމުގެ ފުރަތަމަ 14 ހަފްތާގެ ވައުދުފުޅުތަކުގެ ތެރޭގައި ހިމެނޭ ކަމެއް ކަމަށެވެ. އަދި އެ ދަފްތަރުގައި ރަޖިސްޓްރީވުމަށް އެ މުއްދަތުގެ ތެރޭގައި އިއުލާން ކޮށްފައިވާ ކަމަށް ވެސް އަމީން ވިދާޅުވިއެވެ.
ޓެކްސީ ޑްރައިވަރުންނަށް ލިބޭ އާމްދަނީއަކީ ވަކި މިންވަރެއް ކަނޑައެޅިފައިވާ އެއްޗެއް ނޫންކަމަށް އަމީން ވިދާޅުވިއެވެ. އެހެންކަމުން އެ މީހުންނަށްޓަކައި ވެސް ދައުލަތުގައި ލިބެން ޖެހޭ ލޯން ސްކީމްތަކާއި އެހެނިހެން މަންފާތައް ހުންނަންވާނެކަން އަމީން ފާހަގަކުރެއްވިއެވެ.
ޓެކްސީ ޑްރައިވަރުންނަކީ ވަރަށް ބޮޑަށް އެކަހެރި ކުރެވިފައި ތިބޭ ބައެއްކަން ވެސް އަމީން ފާހަގަކުރެއްވިއެވެ. އެހެންކަމުން ޤާއިމު ކުރެވިގެންދިޔަ މި ދަފްތަރަކީ އެ ފަރާތްތަކަށް ދިމާވާ މާލީ ދަތިތަކަށް ލުއިތަކެއް ހޯދައިފިނުމުގައި އެހީވެދޭނެ ދަފްތަރެއްކަމަށް އަމީން ވިދާޅުވިއެވެ. އެގޮތުން ބޭންކާ ވާހަކަދައްކައިގެން ބައެއް ކަންކަން ރަނގަޅު ކުރުމުގެ މަޝްވަރާތައް ވެސް ކުރެވިފައިވާނެކަމަށް އަމީން ވިދާޅުވިއެވެ. އޭގެ ތެރޭގައި ޓެކްސީ ޑްރައިވަރުން ޕޭމަންޓް ގޭޓްވޭގެ މެޝިންތަކަށް ދެމުންދާ ދެ ރުފިޔާ ނެގުން ހުއްޓާލުމަށް ސަރުކާރުން ބޭންކާ ވާހަކަދައްކައިގެން އެއްބަސްވުމަކަށް އާދެވިފައިވުން ފާހަގަކޮށްލެވެއެވެ.
