ޔޫރަޕިއަން ޔޫނިއަން (އީޔޫ)ގެ އިސް އޮފިޝަލުންގެ ފަސްވަނަ ބައްދަލުވުން ބާއްވާނީ ރާއްޖޭގައި ކަމަށް ފޮރިން މިނިސްޓްރީން ހާމަކޮށްފިއެވެ.
އިއްޔެ ފޮރިން މިނިސްޓްރީން ނެރުނު ބަޔާނުގައި ހާމަކުރި ގޮތުގައި މި ބައްދަލުވުން މިއަދު އެ މިނިސްޓްރީގައި ބޭއްވުމަށް ވަނީ ހަމަޖެހިފައެވެ. މީގެ އިތުރުން އެ މިނިސްޓްރީން ބުނި ގޮތުގައި މި ބައްދަލުވުން ބޭއްވުމުގެ އަމާޒަކީ ރާއްޖެއާއި އީޔޫއާ ދެމެދު މިހާރު އޮތް އެކުވެރިކަން އިތުރަށް ވަރުގަދަ ކުރުމެވެ.
މި އަހަރުގެ ބައްދަލުވުމުގައި ޑިމޮކްރެޓިކް އިސްލާހުތަކާއި، މޫސުމަށް އަންނަ ބަދަލުތައް ކުޑަ ކުރުމާއި، ހެޔޮ ވެރިކަމާއި، ޝަރުޢީ ދާއިރާގެ އިސްލާހުތަކާއި، ސަލާމަތާ ގުޅޭ ކަންކަމުގެ އިތުރަށް، އިތުރު އެއްބާރުލުން ކަނޑައެޅުމަށް މިހާރު ކުރިއަށްދާ މަސައްކަތްތަކުގެ ނަތީޖާތަކަށް ބަލާލެވޭނެކަމަށް އީސީން ވަނީ ބުނެފައެވެ.
މި ބައްދަލުވުމުގައި ބައިވެރިވެވަޑައިގަންނަވާ އިސް ބައެއް ފަރާތްތަކަށް ބަލާލާ އިރު ރާއްޖޭގެ ވަފުދުގެ އިސްވެރިއަކަށް ފޮރިން ސެކްރެޓަރީ ފާތިމަތު އިނާޔާ އަދި ޔޫރަޕިއަން ޔޫނިއަންގެ ވަފުދުގެ އިސްވެރިއަކަށް ޔޫރަޕިއަން އެކްސްޓާނަލް އެކްޝަން ސާވިސްގެ އޭޝިއާ އެންޑް ޕެސިފިކް ޑިޕާޓްމަންޓުގެ ޑެޕިއުޓީ މެނޭޖިން ޑިރެކްޓަރު ޕައޮލާ ޕަމްޕަލޯނީ ހިމެނެއެވެ. މީގެ އިތުރުން މިނިސްޓްރީ އޮފް ފޮރިން އެފެއާޒް، ރައީސް އޮފީސް، އެޓާނީ ޖެނެރަލް އޮފީސް، މިނިސްޓްރީ އޮފް ކްލައިމެޓް ޗޭންޖް، އެންވަޔަރަމަންޓް އެންޑް އެނާޖީ، ނޭޝަނަލް ކައުންޓާ ޓެރަރިޒަމް ސެންޓަރ، މިނިސްޓްރީ އޮފް ފިނޭންސް، ނޭޝަނަލް ރީއިންޓެގްރޭޝަން ސެންޓަރ، އެމްއެންޑީއެފް ކޯސްޓްގާޑް، ޕޮލިސް ސާވީސަސް، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އަދި މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ ފަރާތުން ވެސް މި ބައްދަލުވުމުގައި ބައިވެރިވެވަޑައިގަންނަވަން ހަމަޖެހިފައިވާކަމަށް މައުލޫމާތު ލިބެއެވެ.
މި އަހަރުގެ ޖަނަވަރީ މަހު ފޮރީން މިނިސްޓަރ މޫސާ ޒަމީރު ބެލްޖިއަމްގެ ވެރިރަށް ބްރަސަލްސްއަށް ކުރެއްވި ރަސްމީ ދަތުރުފުޅުގައި ވެސް ޔޫރަޕިއަން އެކްސްޓާނަލް އެކްޝަން ސާވިސްގެ ޑެޕިއުޓީ މެނޭޖިން ޑިރެކްޓަރު ޕައޯލޯ ޕަމްޕަލޯނީއާ ބައްދަލު ކުރައްވައި މުހިންމު މަޝްވަރާތަކެއް ކުރެއްވިކަން ފާހަގަކޮށްލެވެއެވެ. އެގޮތުން ރާއްޖެއިން ޔޫރަޕަށް ފޮނުވާ މަހުގެ ބާވަތްތަކުން ޓެރިފް ކުޑަ ކުރުމާއި ދިވެހިންނަށް އީޔޫގެ ވިސާ ފަސޭހައިން ލިބޭނެ ގޮތްތަކެއް ހަމަޖެއްސުމާ ގުޅޭގޮތުން މަޝްވަރާ ކުރުން ހިމެނެއެވެ.
