ހައްދު ފަހަނަ އެޅި އިސްރާއީލްގެ ރައްޔިތުންނަށް އެ ގައުމުގެ ޕާސްޕޯޓުގައި ރާއްޖެ އެތެރެރެ ނުވެވޭގޮތަށް ދިވެހިރާއްޖެއިން އިސްރާއީލް ޕާސްޕޯޓް ބޭންކޮށްފިއެވެ.
އިސްރާއީލް ޕާސްޕޯޓް މަނާ ކުރުމަށް ގާނޫނަށް އިސްލާހު ގެންނެވުމަށް ނިންމެވީ މިއަދު ބޭއްވުނު ވަޒީރުންގެ މަޖިލީސް ބައްދަލުވުމުގައި އެވެ.
އިސްރާއީލުގެ ޔަހޫދީން ފަލަސްތީނުގައި ހިންގަމުންދާ ގަތުލުއާންމު ތަކާއި ގުޅިގެން، ރާއްޖެ އެތެރެވާ އިސްރާއީލުގެ ފަތުރުވެރިންނަށް ރާއްޖެ އެތެރެ ނުވެވޭނެހެން އެ ގައުމުގެ ޕާސްޕޯޓް ބޭން ކުރުމަށް ގޮވާލައި މިދިޔަ އަހަރުން ސުރެ ގިނަ އަދަދެއްގެ ދިވެހިން އަންނަނީ އަޑު އުފުލަމުންނެވެ.
އެގޮތުން ފަލަސްތީނުގެ ރައްޔިތުންގެ ހައްގުގައި ބޭއްވުނު ބޮޑެތި ހިނގާލުންތަކުގައްޔާއި އެއްވުންތަކާއި އަދި މީސް މީޑިޔާ ހިމެނޭހެން ގިނަ އަދަދެއްގެ ދިވެހިން އަންނަނީ އިސްރާއީލުގެ ޕާސްޕޯޓު ބޭންކުރުމަށް ސަރުކާރަށް ގޮވާލައި ޝުޢޫރު ފާޅުކުރަމުންނެވެ.
އެގޮތުން ފާހަގަކޮށްލަން ޖެހޭ ކަމަކީ މި ފާއިތުވި ސަރުކާރުގައި އިސްރާއީލްގެ ޕާސްޕޯޓް ބޭން ކުރުމަށް ގޮވާލައި ގިނަ އަދަދެއްގެ ސޮޔާއެކު ސަރުކާރަށް ޕެޓިޝަނެއްވެސް ހުށަހެޅިކަމެވެ.
އެހެން ނަމަވެސް އެދެވޭ ގޮތެއްގައި އެކަމަށް އަމަލީ އެއްވެސް މަސައްކަތެއް އޭރު ވަނީ ނުކުރެވިއެވެ.
އެފަހުން ރައީސް ޑރ މުހައްމަދު މުޢިއްޒު ވެރިކަމަށް ވަޑައިގެންފަހުން އެ މަނިކުފާނުގެ ފަރާތްޕުޅުން ސަރުކާރުގެ ތަރުޖަމާނު ވަނީ އިސްރާއީލް ޕާސްޕޯޓްގެ މައްސަލައިގައި ސަރުކާރުން ގޮތް ނިންމަވާނީ ރައްޔިތުންގެވެސް ބައިވެރިވުމާއެކު ކަމުގައިވެސް ބުނެފައެވެ.
މިފަހުން އަލަށް އިންތިޚާބުވެ ހުވާކުރެއްވި 20 ވަނަ ރައްޔިތުންގެ މަޖިލީހަށް އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް ވަނީ، އިސްރާއީލުގެ ޕާސްޕޯޓު ގެންގުޅޭ ފަރާތްތައް ރާއްޖެ އެތެރެވުން މަނާކޮށް އިމިގްރޭޝަންގެ ގާނޫނަށް އިސްލާހެއް ހުށަހަޅުއްވައިފައެވެ.
އިސްރާއީލުގެ ޕާސްޕޯޓް ބޭންކޮށް ދިވެހި ދައުލަތުން ފަލަސްތީނުގެ ރައްޔިތުންގެ ހައްގުގައި މި އެޅި މުހިއްމު ފިޔަވަޅު ވެގެންދާނީ އިސްލާމީ ދަޢުލަތްތަކަށް ފުރިހަމަ ނަމޫނާއެއް ކަމުގައިކަން ޔަގީނެވެ.
