އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަކީ ހަނގުރާމައިގެ ކުށްވެރިއެއް ކަމަށާއި ޤާނޫނު ހަދާ މަޖިލީހުގައި ތަޤްރީރު ކުރުމުގެ ފުރުސަތު އޭނާއަށް ލިބިގެން ނުވާނެކަމުގައި އެމެރިކާގެ ގާނޫނު ހަދާ މަޖިލީހުގެ މެމްބަރު ބާނީ ސެންޑާސް ވިދާޅުވެއްޖެއެވެ.
އެމެރިކާގެ ޤާނޫނު ހަދާ މަޖިލީހުގައި ތަގުރީރު ކުރެއްވުމަށް މަޖިލީހުގެ ރިޔާސަތުން ބެންޖަމިން ނަތަންޔާހޫއަށް ދައުވަތު ދެއްވުމާއި ގުޅިގެން ނަތަންޔާހޫއަށް ދައުވަތު ދެއްވުމުގައި ބައިވެރިވި މަޖިލީހުގެ ލީޑަރުންނަށް ސެންޑާސް ވަނީ ވަރަށް ބޮޑަށް ފާޑު ވިދާޅުވެފައެވެ.
އެގޮތުން އެ ނިންމުމާއި މެދު ވަރަށް ބޮޑަށް ނުރުހުންވުން ފާޅުކުރައްވައި ސެންޑާސް ވަނީ، ތަންޔާހޫ ކަހަލަ ލާއިންސާނީ ޖަރީމާތަކެއް ހިންގައި މުޅި އަތް ލެއިން ތަތްތެޅިފައި ހުރި ލީޑަރަކު އެމެރިކާގެ ޤާނޫނު ހަދާ މަޖިލީހުގައި ތަޤުރީރު ކުރެއްވުމަކީ ވަރަށް ލަދުވެތި، ވަރަށް ހިތާމަވެރި ކަމެއްގެ ގޮތުގައި ސިފަކުރައްވައިފައެވެ.
މީގެ އިތުރުންވެސް ހަނގުރާމައިގެ ކުށްވެރިއަކު ދައްކާ ވާހަކަތައް އަޑުއަހަށް އޭނާ އެ މަޖިލިހަށް ވަޑައި ނުގަންނަވާނެކަން ހާމަކުރައްވައި ސެންޑާސްވަނީ، އިޒުރޭލަށް ނުރައްކަލެއް ކުރިމަތިވެއްޖެ ހާލަތެއްގައި، އެކަމަކުން ރައްކާތެރިވުމާއި ސަލާމަތްވުމުގައި އެކަށީގެންވާ ބާރުގެ ބޭނުންކުރުމަށް އޭނާ ތާއިދުކުރައްވާ ކަމަށެވެ.
އެހެން ނަމަވެސް ޣައްޒާގައި އިޒުރޭލުން މިހާރު އެ ހިންގަނީ ނަސްލު ނައްތާލަން ހިންގާ ޖަރީމާތަކެއް ކަމުގައި ސެންޑާސް ވަނީ ވިދާޅުވެފައެވެ.
އެމެރިކާގެ ގާނޫނު ހަދާ މަޖިލީހުގައި ތަގުރީރުކުރެއްވުމަށް ރުހުން ދިނުމަށް ބޭނުންވާ ލިޔުންތަކުގައި، މަޖިލީހުގެ ރައީސް މައިކް ޖޯންސަންވެސް ވަނީ ސޮއިކުރައްވާފައެވެ. އަދި ރިޕަބްލިކަން ޕާޓީ އާއި ޑިމޮކްރެޓިކް ޕާޓީގެ ލީޑަރުންވެސް ވަނީ ސޮއިކުރައްވާފައެވެ.
އިޒުރޭލުން މިހާރު އެ ކުރާ ހަނގުރާމަ އަކީ ހަމާސްއާ ދެކޮޅަށް ކުރާ ހަނގުރާމައެއް ކަމަށް ގަބޫލުނުކުރައްވާ ކަމަށް ސޭންޑާސް ވިދާޅުވި އެވެ. ހަމާސްއާ ދެކޮޅަށް ކުރާ ހަނގުރާމައެއްގައި މަރުވާނީ ހަމާސްގެ ހަނގުރާމަވެރިން ކަމަށްވެސް ވިދާޅުވިއެވެ.
