ފަލަސްތީނަށް ބޭނުންވާ ކަންކަން ދެނެގަތުމަށް ޚާއްޞަ މަންދޫބެއް ކަނޑައަޅައި، “ފަލަސްތީނާ އެކު ދިވެހިން” ނަމުގައި މުޅި ރާއްޖޭގައި ބޮޑު ހިނގާލުމެއް ބާއްވަން ވަޒީރުންގެ މަޖިލީހުން ނިންމައިފިއެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިހްސާން ވިދާޅުވީ، ފަލަސްތީނަށް އަވަސް ހައްލެއް ގެނެސްދިނުމަށް މަސައްކަތްތައް ކުރަމުން އަންނަކަމަށެވެ. އޭގެ ތެރެއިން ކެބިނެޓުގައި މަޝްވަރާކޮށް މުހިއްމު ކަންތައްތަކެއް އިއްޔެ ނިންމާފައިވާކަމަށް އޭނާ ވިދާޅުވިއެވެ. އެގޮތުން އަނިޔާ ލިބެމުންދާ ފަލަސްތީނުގެ މުސްލިމު އަޚުންނާއި އުޚުތުންގެ ޙައްޤުގައި ހިނގާލުމެއް ބާއްވަން އިއްޔެގެ ވަޒީރުންގެ މަޖިލީހުގެ ބައްދަލުވުމުގައި ނިންމަވާފައިވާކަން އިހްސާން ފާހަގަކުރެއްވިއެވެ.
“ފަލަސްތީނުގެ އަޚުންނާއި އުޚުތުންގެ ޙައްޤުގައި ކެބިނެޓުގައި އަޅުގަނޑުމެން މި ވަނީ ކަންތައްތަކެއް ނިންމާފައި. އެގޮތުން ‘ފަލަސްތީނާއެކު ދިވެހިން’ މި ނަމުގައި މުޅި ރާއްޖޭގައި ހިނގާލުމެއް ބާއްވަން ވެސް ވަނީ ނިންމާފައި” ނޫސްވެރިންނާ މުޚާޠިބު ކުރައްވާ އިޙްސާން ވިދާޅުވިއެވެ.
މީގެ އިތުރުން މިނިސްޓަރު އިޙްސާން ވިދާޅުވީ އިޒްރޭލުގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށްޓަކައި ޤާނޫނުތަކަށް ގެންނަންޖެހޭ އިސްލާހުތައް ގެނައުމަށް ކެބިނެޓުން ނިންމާފައިވާކަމަށެވެ. އަދި އެ ކަން ކުރިއަށް ގެންދިއުމަށް ވަޒީރުންގެ މަޖިލީހުގެ ކޮމިޓީއެއް އެކުލަވާލައްވާފައިވާކަމަށް ވެސް އޭނާ ވިދާޅުވިއެވެ.
އެ ކޮމިޓީގައި ހިމެނިވަޑައިގަންނަވަނީ، ހޯމް މިނިސްޓަރާއި ބަންޑާރަ ނައިބު އަޙްމަދު އުޝާމާއި އިކޮނޮމިކް މިނިސްޓަރު މުޙައްމަދު ސައީދާއި ޓޫރިޒަމް މިނިސްޓަރު އިބްރާހިމް ފައިސަލާއި ފޮރިން މިނިސްޓަރު މޫސާ ޒަމީރު އަދި އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދެވެ.
މިނިސްޓަރު އިހުސާން ވިދާޅުވީ، ފަލަސްތީނާއި އިޒްރޭލުގެ މައްސަލައިގައި ރާއްޖޭގެ ފަރާތުން ފަލަސްތީނަށް ބެނުންވާ ކަންކަން ދެނެގަތުމަށް ރައީސްގެ ސްޕެޝިއަލް އެންވޯއިއެއް ކަނޑައަޅުއްވަން ވެސް ނިންމާފައިވާކަމަށާއި ފަލަސްތީނުގެ ހާލުގައި ޖެހިފައިވާ އަޚުންނާއި އުޚުތުންނަށް އެހީތެރިކަން ފޯރުކޮށްދިނުމަށްޓަކައި “ޔޫއެން ރިލީފް އެންޑް ވޯކްސް އެޖެންސީއާ” ގުޅިގެން ރާއްޖޭގައި ފަންޑްރައިޒް ހަރަކާތްތަކެއް ހިންގުމަށް ވެސް ނިންމަވާފައިވާކަމަށެވެ.
ފަހު ކަމެއްގެ ގޮތުގައި މިނިސްޓަރު ވިދާޅުވީ، ރާއްޖެއިން އިސްނަގައިގެން ފަލަސްތީނުގެ މައްސަލައަށް އަވަސް ހައްލެއް ގެނައުމަށްޓަކައި އިސްލާމީ ގައުމުތައް އެކުވެގެން މަޝްވަރާ ބައްދަލުވުންތަކެއް ބޭއްވުމަށް ވެސް ކެބިނެޓުން ނިންމާފައިވާކަމަށެވެ.
ފަލަސްތީނުގެ ޙައްޤުގައި އަޑުއުފުލުމަށް މީގެ ކުރިން ވެސް ރާއްޖޭގައި އެއްވުންތައް ބާއްވާފައިވެއެވެ. އެގޮތުން މިދިޔަ ހުކުރު ދުވަހު އާޓިފިޝަލް ބީޗަށް ރައްޔިތުން އެއްވެ އިހުސާސް ފާޅު ކުރުން ފާހަގަކޮށްލެވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެދިވަޑައިގަތުމަށް ފަލަސްޠީނަށް އެހީވުމަށް ޚާއްޞަ ޓެލެތޯނެއް ކުރިއަށް ގެންދިއުމަށް ދައުލަތުގެ މީޑިއާ ޕީއެސްއެމުން ވެސް ވަނީ ނިންމާފައެވެ. މި ޓެލެތޯން ބާއްވަން ހަމަޖެހިފައިވަނީ މި މަހުގެ 12 ވަނަ ދުވަހުއެވެ.
ފަލަސްތީނުގެ ޙައްޤުގައި ދިވެހިން ތިބިކަން ސާބިތުކޮށްދިނުމަށް އިސްރާޢީލުގެ ޕާސްޕޯޓުގައި ރާއްޖެއަށް އެތެރެ ނުވެވޭނެހެން ޤާނޫނަށް ބަދަލުގެނައުމަށް އިއްޔެ ބޭއްވެވި ކެބިނެޓު ބައްދަލުވުމުގައި ސަރުކާރުން ވަނީ ނިންމާފައެވެ. އެމްޑީޕީއާއި މީގެކުރިން ވެރިކަން ކުރި އެއްވެސް ސަރުކާރަކަށް އިސްރާއީލުގެ ޕާސްޕޯޓް މަނާކުރުމަށް މާބޮޑު މަސައްކަތްތަކެއް ކުރެވިފައި ނެތްކަން އެއީ ޤަބޫލުކުރަންޖެހޭ ޙަޤީޤަތެކެވެ. އެހެންކަމުން ގިނަ ބަޔަކު ޤަބޫލު ކޮށްގެން ތިބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް ވެސް އިސްރާއީލުގެ ޕާސްޕޯޓް މަނާ ކުރުމަކީ ނުވާނެކަމެއްކަމަށެވެ. ކޮންމެ ސަބަބަކާ ހުރެ ވިޔަސް މީގެ ކުރިން ވެރިކަން ކުރި އެއްވެސް ރައީސަކަށް ނިންމަވަން ކެރިވަޑައިނުގެން ނިންމެވުމެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވުމަކީ އެމަނިކުފާނުގެ ވަރުގަދަ ޝަހުސިއްޔަތާއި ދީނަށްޓަކައި އޮތް ލޯބި ހާމަކޮށްދޭ އަލިގަދަ ހެތްކެއްކަން ޔަޤީނެވެ.
