ހެލްތު މިނިސްޓްރީން ހުއްދަ ނުނަގައި އޮތުމުން ފަޒީސް ހިޖާމާ ތެރަޕީ ސެންޓަރާ ދެކޮޅަށް ފިޔަވަޅު އަޅަން ހެލްތު މިނިސްޓްރީގެ ލީގަލް ޑިޕާޓްމަންޓަށް އެ މިނިސްޓްރީން އަންގައިފިއެވެ.
ފަޒީލާ އުޘްމާން ހިޖާމާ ފަރުވާ ދެމުންގެންދާ ސެންޓަރަކީ އަދިވެސް ހެލްތު މިނިސްޓްރީން ހުއްދަ ނުނަގައި ކުރިއަށްގެންދާ ސެންޓަރެއްކަމަށާއި އެ މައްސަލަ މިހާރު ބަލަމުން އަންނަ ކަމަށް ހެލްތު މިނިސްޓްރީން އިއްޔެ ވަނީ އާންމުކޮށްފައެވެ.
2022 ވަނަ އަހަރު ފަޒީލާގެ ހިޖާމާ ސެންޓަރު މިނިސްޓްރީން ބަންދު ވެސް ކުރިއެވެ. އޭރު އެ ސެންޓަރު ބަންދު ކުރީ ސިއްހީ ބައެއް މައްސަލަތަކަށް ހިޖާމާއިން ފަރުވާ ލިބޭ ކަމަށް ބުނެ ފަޒީލާ ދެއްކި ވާހަކަތަކަކާ ގުޅިގެން މައްސަލަ ހޫނުވެފައި ވަނިކޮށެވެ. މީގެ އިތުރުން އާއްމުންނާ މެދު މުޢާމަލާތް ކުރާ ގޮތުގެ ސަބަބުން ވެސް ފަޒީލާއަށް އޭރު ވަނީ އާއްމުންގެ ފާޑުކިޔުން އަމާޒުވެފައެވެ. އޭރު އޭނާ ވަނީ ދެން އެ ކަން ކުރާނީ ހުއްދަތައް ހަމަކޮށްގެންކަމަށް މީޑިއާތަކަށް މައުލޫމާތު ދީފައެވެ. ނަމަވެސް އަދިވެސް އެއްވެސް ހުއްދައެއް ހެލްތު މިނިސްޓްރީގެ ފަރާތުން އޭނާއަށް ދޫކޮށްފައި ނުވާކަމަށް ހެލްތު މިނިސްޓްރީގެ ކޮމިއުނިކޭޝަން ޑިރެކްޓަރު ޝައުފާ ހުސެއިން ވަނީ މީޑިއާތަކާ ހިއްސާކޮށްފައެވެ. އެހެންކަމުން ގަވާއިދާ ޚިލާފަށް ހިޖާމާ ޖެހުމުގެ މަސައްކަތް ކުރާތީ އޭނާއާ ދެކޮޅަށް ފިޔަވަޅު އަޅަން، ކޮލިޓީ އެޝުއަރެންސް ޑިޕާޓްމަންޓުން މި ހަފުތާގައި އަންގާފައިވާކަމަށް ޝައުފާ ހާމަކުރެއެވެ. “ހެލްތު ޕްރޮފެޝަނަލްސްގެ ގާނޫނުގެ ދަށުން ލައިސެންސް ނެތި ހިދުމަތް ދޭތީ 75،000ރ. އަށް ވުރެ ބޮޑު ނޫން އަދަދަކުން ޖޫރިމަނާ ކުރެވޭނެ. ދެން ހެލްތު ސާވިސް ގާނޫނުގެ ދަށުން ތަން ބަންދުކުރެވޭނެ،” ހެލްތް މިނިސްޓްރީން ބުނެފައިވެއެވެ.
މި މައްސަލަ ހެލްތު މިނިސްޓްރީގެ ދެ ޑިޕާޓްމެންޓަކުން ބަލަމުން އަންނަ އިރު މައްސަލައިގައި ފިޔަވަޅު އަޅާނެ ކަމެއް ނުވަތަ އަޅާނެ ފިޔަވަޅެއް އަދި އެ މިނިސްޓްރީން ހާމައެއް ނުކުރެއެވެ.
ދާދި ފަހުން ވެސް ސޯޝަލް މީޑިއާގައި ބައްޔަކާ ގުޅޭ ގޮތުން އޭނާ ދައްކާފައިވާ ވާހަކަތަކެއްގެ ސްކްރީންޝޮޓުތަކެއް ވަނީ އާންމުވެފައެވެ. އެ ކަމުގެ ސަބަބުން ގިނަ ބަޔަކު ވަނީ އެ ކަމާ މެދު ނުރުހުން ފާޅުކޮށް އޭނާއަށް ފާޑު ކިޔައިފައެވެ.
ފަޒީލާ މީޑިއާތަކަށް ހާމަކުރި ގޮތުގައި ދުވާލެއްގެ މައްޗަށް ތިރީހަކަށް މީހުން އޭނާ ކައިރިން ހިދުމަތް ހޯދާއެވެ. އެ ކޮންމެ ސެޝަނަކަށް 1000ރ. ގެ މަގުން ދުވާލެއްގެ މައްޗަށް 30،000ރ. ވަރުގެ އާމްދަނީއެއް އޭނާއަށް ލިބެއެވެ. އެއީ މަހެއްގެ މައްޗަށް 800،000 އެއްހާ ރުފިޔާއެވެ.
ފަޒީލާ ވަނީ ހިޖާމާ ޖެހުމަށް އިނގިރޭސި ވިލާތުގެ ޔޫކޭގެ ހިޖާމާ ނޭޝަންސްއިން އޮންލައިންކޮށް ޑިޕްލޮމާ ސެޓްފިކެޓެއް ހޯދައިފައެވެ. ފާހަގަކޮށްލެވޭ ގޮތުގައި ރާއްޖޭގައި ހިޖާމާ ފަރުވާ ދެވެނީ ހެލްތު މިނިސްޓްރީން އެ ކަމަށް ޚާއްސަ ހުއްދައެއް ނަގައިގެންނެވެ.
