ޣައްޒާގެ މެދުތެރޭގައި ފަލަސްތީނުގެ ރައްޔިތުންނަށް ބޯހިޔާވަހިކަން ދިނުމަށް އދ އިން ހިންގާ ސްކޫލަކަށް އިޒްރާއިލުން ދިން ވައިގެ ހަމަލާއެއްގައި 40 މީހުން މަރުވެއްޖެއެވެ.
ބުރާސްފަތި ދުވަހު އިޒްރާއިލުން މިހަމަލާ ދީފައިވަނީ އެމީހުންގެ އަސްކަރިއްޔާއިން ޣައްޒާގެ މެދުތެރޭގައިވާ ގިނަ ރެފިއުޖީ ކޭމްޕެ ތަކަކަށް ހަމަލާ ދޭން އުޅޭކަމުގެ އިންޒާރު ދިނުމަށްފަހުގައެވެ. މި ހަމާގައި ގިނައިން މަރުވެފައިވަނީ އަންހެނުންނާއި ކުޑަކުދިންނެވެ.
ފަލަސްތީނުގެ ކަމާބެހޭ ފަރާތްތަކުން ޚަބަރުދޭ ގޮތުގައި މި ސްކޫލަކީ ފަލަސްތީނުގައި ގެދޮރު ގެއްލިފައިވާ އެތައްހާސް ބަޔަކަށް ބޯހިޔާވަހިކަންދިނުމަށް އދ އިން ހިންގާ ތަނެއްކަމުގައެވެ. އިޒްރާއިލުން މި ހަމަލާއާއި ގުޅިގެން ނެރުނު ބަޔާނެއްގައި ބުނެފައިވަނީ އެ ސްކޫލަކީ ހަމާސްގެ ހަނގުރާމަވެރިން ބޭނުންކުރާ ޖަގަހައެއް ކަމުގައެވެ. އެހެންނަމަވެސް ފަލަސްތީނުގެ ސަރުކާރުން ވަނީ މި ތުހުމަތުތައް ދޮގުކޮށް މި ހަމަލާ ވަރަށް ބޮޑަށް ކުށްވެރިކޮށްފައެވެ.
އިޒްރާއިލުން ޣައްޒާގައި ކެނޑިނޭޅި ދެމުންދާ ހަމަލާތަކުގައި މިހާތަނަށް ފަލަސްތީނުގެ 36,000 އަށްވުރެ ގިނަ މީހުންވަނީ މަރުވެފައެވެ.
