އޮންލައިން ވިޔަފާރި ކުންފުނި އެމެޒޯން 5.9 މިލިއަން ޑޮލަރުން ޖޫރިމަނާކޮށްފިއެވެ.
އެމެޒޯން ޖޫރިމަނާ ކޮށްފައިވަނީ އެމެރިކާގެ ގުދަންތަކުގައި މަސައްކަތް ކުރާ މުވައްޒަފުން ހިމާޔަތް ކުރުމުގެ މަޤްޞަދުގައި އެކުލަވާލާފައިވާ އާ ޤާނޫނު – “ވެއާހައުސް ކޯޓާ” ޤާނޫނާ ޚިލާފުވުމުންނެވެ. އެ ޤާނޫނަކީ އެ ފަދަ އަސާސީ ޙައްޤުތަކުން މީހުން މަހުރޫމު ކުރުން ހުއްޓުވުމަށް ހަދައިފައިވާ ޤާނޫނެކެވެ. އެ ޤާނޫނު ބުނާ ގޮތުން ކުންފުނިތަކުން މުވައްޒަފުންގެ މަޤާމުގެ މަސްއޫލިއްޔަތުތަކާއި، ޒިންމާތައް ނުވަތަ މަސައްކަތް ކުރަންޖެހޭ މިންވަރު މުވައްޒަފުންނާއި ރެގިއުލޭޓަރުންނަށް ހާމަކުރަން ޖެހެއެވެ. އަދި ދައުލަތުން ލާޒިމްކޮށްފައިވާ ގޮތަށް، މަސައްކަތްތެރިންނަށް ކެއުމާއި އަރާމުކުރުމަށް ހުސްވަގުތު ދީ، ފާޚާނާ ކުރަން ޖެހިއްޖެ ނަމަ ފާޚާނާއަށް ދިޔުމުގެ ފުރުސަތު ފަހިކޮށްދޭން ޖެހެއެވެ.
އެމެޒޯންގެ ގުދަންތަކުގައި މަސައްކަތް ކުރާ މީހުންނަށް ހުސް ވަގުތުކޮޅެއް ނުދީ، އެތައް އިރެއް ވަންދެން މަސައްކަތް ކުރުވުމާއި ޝިފްޓު ގަޑީގައި ފާޚާނާ ކުރަން ވެސް ހުއްދަ ނުދިނުމުގެ ޝަކުވާތައް މީގެ ކުރިން ވަނީ ފެންމަތިވެފައެވެ. އެ ފަދަ ޝަކުވާތަކާ ގުޅިގެން ކެލިފޯނިއާގެ ލޭބާ ރެގިއުލޭޓަރުން ކުރި ތަޙުޤީޤަކުން އެނގިފައިވާ ގޮތުގައި ލޮސް އެންޖެލިސްގައި ހުންނަ އެ ކުންފުނީގެ 2 ގުދަނެއް ހިމެނޭހެން 59،000އަށް ވުރެ ގިނަ މުވައްޒަފުންގެ ޙައްޤުތަކުން މަހުރޫމު ކޮށްފައިވުމާ ގުޅިގެން އެ ޤާނޫނާ ޚިލާފުވީކަމުގައި ބަލައި އެމެޒޯނާ މެދު ފިޔަވަޅު އެޅުމަށް ވަނީ ނިންމާފައެވެ.
މި މައްސަލައިގައި އެމެޒޯނުން ބުނެފައިވަނީ، އެ ކުންފުނިން މުވައްޒަފުންގެ މައްޗަށް ހަރުކަށި އަމުރުތަކެއް ނުކުރާކަމަށާއި މުވައްޒަފުންގެ މަސައްކަތް ރަނގަޅު ކުރުމަށް ސިޔާސަތެއް އޮންނަކަމަށެވެ. އަދި އެމެޒޯންގެ މައްޗަށް އުފުލާފައިވާ 5.9 މިލިއަން ޑޮލަރުގެ ޖޫރިމަނާ އިސްތިއުނާފު ކުރަން އެ ކުންފުނިން ވަނީ ނިންމައިފައެވެ.
