އީދު މިސްކިތުން މި މަހު އެކަނި ވެސް 10 ފަންކާ ވަގަށް ގެންގޮސްފައިވާ ކަމަށް މާލެ ސިޓީ ކައުންސިލުން ބުނެފިއެވެ.
އީދު މިސްކިތުން މި މަހު އެކަނި ވެސް 10 ފަންކާ ވަގަށް ގެންގޮސްފައިވާ ކަމަށާއި އެ މައްސަލަތައް ފުލުހަށް ހުށަހެޅުމުގެ މަސައްކަތް ކުރަމުންދާ ކަމަށް މާލޭ ސިޓީ ކައުންސިލުން އެކްސްގައި ރޭ ކުރި ޕޯސްޓެއްގައި ބުނެފައިވެއެވެ.
މާލޭގައި ވައްކަމުގެ މައްސަލަތައް އިތުރުވެ ފެންމަތިވަމުން އަންނަމުންދާއިރު، މިކަންކަމާއި ގުޅުވައިގެން ފުލުހުންގެ ތަރުޖަމާނު، އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާން މިއަދު އެކްސްގައި ކުރި ޕޯސްޓެއްގައި ބުނެފައިވާ ގޮތުގައި މިއަހަރުގެ މިހާތަނަށް މާލޭގެ މިސްކިތްތަކުން ވައްކަންކޮށްގެން 21 މައްސަލައެއް ހުށަހަޅާފައިވާ ކަމަށެވެ.
ޝިފާން ވިދާޅުވި ގޮތުގައި ވަގަށް ނަގާފައިވާ ތަކެތީގެ ތެރޭގައި ހިމެނޭ ހަ ފަންކާއާއި ދެ ފޯނާއި ފެންމޯޓަރެއް ހޯދައި، އެ ތަކެތީގެ ވެރިފަރާތާ ހަވާލުކޮށްފައިވާ ކަމަށެވެ.
މިދިޔަ އާދިއްތަ ދުވަހު މާލޭ ޖުމްހޫރީ މައިދާނުގައި ދިއްލާފައިހުރި ބައެއް އީދު ލައިޓުތަކުގެ ކޭބަލްތައް ވަގަށް ނަގާފައިވާއިރު، އޭގެ ދުވަސް ކޮޅެއް ކުރިން މާލޭ ފުޑް ކޯޓު ކައިރި ޖަހާފައި ހުރި ބައްތިތަކުގެ ކޭބަލްތަކެއް ވަގަށް ނަގައި، ހަމައެރޭ ސިނަމާލޭ ތިނެއްގެ ފެން މޯޓަރުގެ ކޭބަލް ވެސް ބުރިކޮށްލައިގެން ވަގަށް ނަގާފައިވެއެވެ.
ވައްކަމުގެ މިމައްސަލަތައް ފުލުހުން މިހާރު ތަހުގީގު ކުރަމުންދާއިރު، ވައްކަމުގެ މައްސަލަތަކަކީ މިހާރު އެންމެ ގިނައިން ރިޕޯޓް ކުރެވޭ މައްސަލަތަކެވެ. އެގޮތުން ހުސްވި މަހުވެސް ފުހުލުންނަށް އެންމެ ގިނައިން ވައްކަމުގެ މައްސަލަ ހުށަހެޅިފައިވާއިރު، މިއަހަރުގެ މިހާތަނަށް ވައްކަމުގެ 1،677 މައްސަލަ ރިޕޯޓުކޮށްފައިވެއެވެ.
