ޙައްޖުގެ މަތިވެރި އަޅުކަން އަދާކުރުމަށް މައްކާއަށް ދިޔަ ޙައްޖުވެރިން، ހޯމަ ދުވަހު އެނބުރި ރާއްޖެ އަންނަން ފަށާނެކަމަށް އިސްލާމީ ކަންތައްތަކާ ބެހޭ ވުޒާރާއިން ބުނެފިއެވެ.
އެގޮތުން ހައްޖާޖީން އެނބުރި ރާއްޖެއައުމަށްޓަކައި މިހާރު ދަތުރަށް ތައްޔާރުވާ ފަށައިފައިވާކަމަށާއި ހައްޖުވެރިންގެ ފުރަތަމަ ގްރޫޕު ހޯމަ ދުވަހު ރާއްޖެއައުމަށް ހަމަޖެހިފައިވާ ކަމަށް އެވުޒާރާއިން ބުނެއެވެ.
އަދި ދެވަނަ ގްރޫޕު މިމަމަހުގެ 28 ވަނަ ދުވަހު އައުމަށް ހަމަޖެހިފައިވާއިރު ތިން ވަނަ ގްރޫޕު ޖުލައި މަހުގެ 1 ވަނަ ދުވަހު އަދި ހަތަރު ވަނަ ގްރޫޕު ޖުލައި މަހުގެ 4 ވަނަ ދުވަހު އައުމަށް ހަމަޖެހިފައިވާ ކަމަށް އެވުޒާރާއިން ވަނީ ބުނެފައެވެ.
އެވުޒާރާއިން އިތުރަށް ބުނީ ދިވެހި ޙައްޖުވެރިންގެ ތެރެއިން މިހާތަނަށް ނިޔާވީ 1 ހައްޖުވެރިއެއް ކަމަށާއި މިވަގުތު ހޮސްޕިޓަލުގައި އެނދުމަތި ކުރެވިގެން 1 ޙައްޖުވެރިއަކަށް ފަރުވާ ދެމުން އަންނަ ކަމަށާއި، ހުރިހާ ޙައްޖުވެރިންގެ ޙާލުވެސް ޖުމުލަކޮށް ރަނގަޅު ކަމަށެވެ.
ރާއްޖެއިން މިއަހަރުގެ ހައްޖުގެ އަޅުކަމަށް 1150 ހައްޖުވެރިން ވަނީ ގޮސްފައިވެއެވެ.
