އައްޑޫ ހުޅުމީދޫ މިފްކޯ ބަނދަރަށް އެއްވެ މަސްވެރިން ކުރަމުންގެންދާ އިހުތިޖާޖުގައި އެއްވެ އުޅުމާއި ޚިޔާލު ފާލުކުރުމުގެ މިނިވަންކަމުގެ ޤާނޫނާއި އެހެނިހެން ޤާނޫނުތަކާ ޤަވައިދުތަކުގެ ހުދޫދުގެ ތެރެއިން ބޭރުނުވުމަށް އިލްތިމާސްކޮށް ފުލުހުން ބަޔާނެއް ނެރެފިއެވެ.
މިފްކޯ ބަނދަރަށް މަސްވެރިން އެއްވެ މުޒާހަރާ ކުރަމުންގެންދަނީ ފައިސާ ނުލިބޭ މައްސަލައިގައެވެ. އަދި މުޒާހަރާއާ ގުޅިގެން އެކަށީގެންވާ ޖަވާބެއް ނުލިބިއްޖެ ނަމަ، މަސް ފެކްޓަރީގެ ހުރިހާ ސީނިއާ މުވައްޒަފުން ފެކްޓްރީން ބޭރުކޮށް، މަސް ކެއްކުމަށް ހުރަސް އަޅާނެކަމަށް މަސްވެރިން ގެންދަނީ ބުނަމުންނެވެ. އިހުތިޖާޖު ކުރާ މަސްވެރިން ބުނާ ގޮތުގައި އެ މީހުންނަށް ފައިސާ ނުދޭތާ 2 މަސް ވެއްޖެއެވެ. އަދި ގާތްގަނޑަކަށް މަސްވެރިންނަށް 80 މިލިއަނެއްހާ ރުފިޔާ ނުލިބި އޮތްކަމަށް ވެސް އެ މީހުން ދަނީ ބުނަމުންނެވެ. މީގެ އިތުރުން މަސްވެރިންނަށް މިދިޔަ ހަފްތާގައި މިފްކޯއިން ޖަމާކޮށްދޭން ބުނި 46 މިލިއަން ރުފިޔާ އަދިވެސް ނުލިބޭކަމަށް މަސްވެރިން ބުނެއެވެ.
އައްޑޫގައި މިހާރު ކުރިއަށްގެންދާ އިހުތިޖާޖާ ގުޅިގެން ފުލުހުން ރޭގައި ނެރުނު ބަޔާނުގައި ބުނީ ސުލްހަވެރިކަމާއެކު ޤާނޫނީ އިމުގެ ތެރެއިން އިހުތިޖާޖު ކުރިއަށް ގެންދިއުމުގެ ފުރުސަތު އެ މުއައްސަސާއިން ދީފައިވާނެކަމަށެވެ. ހަމައެއާއެކު އެ ބަޔާނުގައި ފުލުހުން ވަނީ އެ ސަރަހައްދުގެ ރައްކާތެރިކަން ކަށަވަރުކުރުމަށް އެ އިދާރާއިން އަޅާ ފިޔަވަޅުތަކަށް މަސްވެރިންގެ ފަރާތުން އެއްބާރުލުންދިނުމަށް އެދިފައެވެ. އަދި އެ ގޮތަށް ކުރިއަށްގެންދާ އިހުތިޖާޖުތަކުގައި ޤާނޫނާއި ޤަވާއިދުތަކަށް ހުރުމަތްތެރިކޮށް ހިތައި އާންމު މަސްލަހަތު އިސްކުރުމަށް ފުލުހުން ވަނީ އިލްތިމާސްކޮށްފައެވެ.
މީގެ އިތުރުން އިހުތިޖާޖު ކުރުމުގައި މަސްވެރިންގެ ކަންބޮޑުވުންތަކާއި ޝުޢޫރުތައް ފާޅުކުރުމުގައި ފުލުހުންގެ ފަރާތުން ސެކިއުރިޓީ ލައިން ގާއިމްކޮށް މަސްވެރިންނަށް ދޭންޖެހޭ އެއްބާރުލުން ދޭނެކަމަށް ފުލުހުން ވަނީ ބުނެފައެވެ.
ފުލުހުން ހާމަކުރާ ގޮތުގައި މި އިހުތިޖާޖާ ގުޅިގެން މިފްކޯ އައްޑޫ ފިޝަރީޒް ކޮމްޕްލެކްސްގެ އޮޕަރޭޝަންތަކަށް ހުރަސްއެޅި ބައެއް މަސައްކަތްތައް ވަނީ ހުއްޓިފައެވެ. އަދި އޮޕަރޭޝަންތައް އަލުން ފެށޭނެ މާހައުލެއް އުފެއްދުމަށް މަސައްކަތް ކުރަމުން އަންނަކަމަށް ވެސް އެ ބަޔާނުގައި ފުލުހުން ބުންޏެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވައުދުވެ ވަޑައިގެންފައި ވަނީ މަސްވެރިން ކިރާ މަހަށް އެންމެ ގިނަ ވެގެން ދެ ދުވަސް ތެރޭގައި ފައިސާ ޖަމާ ކުރުމަށެވެ. ނަމަވެސް ދައުލަތުގެ މާލީ ހާލަތު ހުރި ގޮތުންނާއި މިފްކޯގެ މާލީ ހާލަތު ރަނގަޅު ނުކޮށް އެ ފަދަ ވައުދުތައް ފުއްދަން އުނދަގޫވާނެކަމަށް ފިޝަރީޒް މިނިސްޓަރު އަޙްމަދު ޝިޔާމް ވަނީ ވިދާޅުވެފައެވެ. މި ސަރުކާރުން ވެރިކަމާ ހަވާލުވިއިރު ވެސް މަސްވެރިންނަށް ނުދެވި 250 މިލިއަނަށް ވުރެ ގިނަ ރުފިޔާ އޮތެވެ. މި ސަރުކާރުގެ ފުރަތަމަ ހަ މަސް ދުވަހުގެ ތެރޭގައި އެކަނި ވެސް މަސްވެރިންނަށް 850 މިލިއަނަށް ވުރެ ގިނަ ރުފިޔާ ވަނީ ދޫކޮށްފައެވެ.
މި ކަމާ ގުޅިގެން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމު ޕީއެސްއެމް ނިއުސްއަށް ދެއްވި އިންޓަވިއުއެއްގައި ވިދާޅުވީ މަސްވެރިންގެ އަޑު ވަރަށް ގާތުން އަހަމުން އަންނަކަމަށެވެ. އެގޮތުން އިހްތިޖާޖުގައި އިސްކޮށް ހަރަކާތްތެރިވާ ފަރާތްތަކާ ގުޅައިގެން މުއާމަލާތްތައް ކުރެވެމުންދާކަމަށް ޝިޔާމު ވިދާޅުވިއެވެ. އަދި ސަރުކާރުން މަސައްކަތްކުރަމުންދަނީ މަސްވެރިކަމުގެ ދާއިރާއިން ވެފައިވާ ވައުދުތައް ފުއްދުމަށްޓަކައިކަން ވެސް ޝިޔާމުގެ ވާހަކަފުޅުގައި ފާހަގަކުރައްވާފައިވެއެވެ. މީގެ އިތުރުން އިއްޔެ މެންދުރު ފަހު އެކްސްގައި ކުރެއްވި ޕޯސްޓެއްގައި ޝިޔާމު ވިދާޅުވީ އެ ކަމުގައި މިފްކޯއާއި ސަރުކާރުން ކުރަމުންދާ މަސައްކަތުގެ ތަފްސީލު ހިއްސާ ކުރަމުން ގެންދާނެކަމަށެވެ.
