އައްޑޫ ފިޝަރީޒް ކޮމްޕްލެކްސްގައި ހިންގަމުންދާ އިހުތިޖާޖުގައި އައްޑޫ ފިޝަރީޒް ކޮމްޕްލެކްސް އިން ކަރަންޓު ކަނޑާލުމުން ފުލުހުންގެ އެހީތެރިކަމާއެކު އެ ކޮމްޕްލެކްސްއަށް ކަރަންޓު ދިނުމުން އަނެއްކާވެސް ކަރަންޓް ކަނޑާލައިފި ކަމަށް މިފްކޯއިން ބުނެފިއެވެ.
އައްޑޫ ފިޝަރީޒް ކޮމްޕްލެކްސްގައި އިހުތިޖާޖު ކުރާ މީހުން ކަރަންޓު ދޭން ފުރުސަތު ނުދިނުމުގެ ސަބަބުން ފުލުހުންގެ އެހީތެރިކަމާއެކު މިއަދު ހަވީރު 5:30 ހާއިރު އެކޮމްޕްލެކްސްއަށް ކަރަންޓް ދީފައިވާއިރު، އިހުތިޖާޖު ކުރަން އެތަނަށް އެއްވެފައިވާ މީހުންގެ އަމަލުތައް ހުރިގޮތުން އަނެއްކާވެސް ކަރަންޓު ކަނޑާލާފައިވާކަމަށް މިފްކޯއިން ބުނެފައިވެއެވެ. އަދި މިހާރު ދަނީ އަލުން ކަރަންޓު ދިނުމުގެ މަސައްކަތް ކުރަމުން ކަމަށް ވެސް އެކުންފުނުނިން ބުނެފައިވެއެވެ.
މިފްކޯއިން މައުލޫމާތު ދިންގޮތުގައި އެކޮމްޕްލެކްސްއަށް ކަރަންޓް ދިނުމަށް ހަވީރު ކުރި މަސައްކަތްތަކަށް ހުރަސް އެޅޭފަދަ ޢަމަލުތަކެއް އެތަނުގައި އެއްވެ އުޅޭ މީހުން ކުރުމުން ފުލުހުން އެވަގުތު ބާރުގެ ބޭނުން ކޮށްފައިވާ ކަމަށެވެ.
އިހުތިޖާޖުގެ ބައިވެރިން އެކުންފުނީގެ މުދަލަށް ގެއްލުން ދީފައިވާ ކަމަށާއި ހުއްދަ ނެތް ސަރަހައްދުތަކަށް ވަދެ އެފެސިލިޓީގެ މަސައްކަތްތަކަށް ހުރަސް އަޅާފައިވާ ކަމަށް މިފްކޯއިން ބުނެފައިވެއެވެ. މީގެ އިތުރުން މިފަދައިން އަމަލުކޮށް މުވައްޒަފުން ދިރިއުޅޭ ސަރަހައްދުތަކަށް ވަދެ ކަރަންޓު ދޭން ފުރުސަތު ނުދިނުމުގެ ސަބަބުން މުވައްޒަފުންގެ ޒަރޫރީ ކަންކަން ފުއްދުމަށް ހުރަސް އެޅިފައިވާ ކަމަށްވެސް އެކުންފުނިން ބުނެފައިވެއެވެ.
