ފުވައްމުލަކު ސިޓީގެ ދޫނޑިގަމު އަވަށުގައި ފުލުހުން ކުރިއަށް ގެންދިޔަ މަސްތުވާތަކެތީގެ އޮޕަރޭޝަނަކަށް ހުރަސްއަޅައި ފުލުހުންނާ ކުރިމަތިލި ބަޔަކ ހައްޔަރުކޮށްފިއެވެ.
މި މައްސަލައާއި ގުޅިގެން ފުލުހުން ބިދާޅުވީ، މަސްތުވާތަކެތި ގެންގުޅުނު ކަމަށް ތުހުމަތުކުރެވޭ މީހަކު ފުލުހުންގެ ބެލުމުގެ ދަށަށް ގެންދަން އުޅުމުގެ ތެރޭގައި އެތަނަށް އިތުރު ބަޔަކު ގޮސް ފުލުހުންނާ ކުރިމަތިލައިފައިވާ ކަމަށެވެ.
އެގޮތުން ފުވައްމުލަކު ޕޮލިސް ސްޓޭޝަން ކުރިމައްޗަށް ބަޔަކު އެއްވެ، ސްޓޭޝަން ތެރެއަށް އެތަނުން މީހަކު ވަދެ ހަމަނުޖެހުން ހިންގުމަށް މަސައްކަތް ކޮށްފައިވާ ކަމަށާއި އެ ހާދިސާގައި ފުލުހަކަށް އަނިޔާވެސް ވެފައިވާކަމަށް ފުލުހުން ވިދާޅުވެއެވެ.
އަދި އެ މައްސަލައިގައި ހަމަ ނުޖެހުން ހިންގި ތިން މީހުން ހައްޔަރުކޮށްފައި ވާކަމަށްވެސް ފުލުހުން ވަނީ ވިދާޅުވެފައެވެ.
މީގެ އިތުރުން ފުލުހުން ވިދާޅުވީ، މި ކަމަކީ ފުލުހުން ހިންގި އޮޕަރޭޝަނާ ދެކޮޅަށް އެކަން ހުއްޓުވުމަށާއި ކުށްކުރުމަށް ހިތްވަރުދިނުމުގެ މަގުސަދުގައި ބަޔަކު މަސައްކަތް ކޮށްފައިވާ ކަމެއްކަމަށެވެ.
