ސިހުރުގެ ތުހުމަތެއްގައި އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ހައްޔަރުކޮށްފިއެވެ.
ފުލުހުން ވިދާޅުވީ، ޖިނާއީ ކުށެއްގެ ތުހުމަތުގެ ތުހުމަތުގައި ސްޓޭޓް މިނިސްޓަރު ފާތިމަތު ޝަމްނާޒް ހިމެނޭހެން ތިން މީހަކު ހައްޔަރުކޮށްފައި ވާކަމަށާއި އެ މީހުންގެ ބަންދަށް ކޯޓުން ހަތް ދުވަސް ޖަހާފައިވާ ކަމަށެވެ.
މި 3 މީހުން ހައްޔަރު ކޮށްފައި ވަނީ މި މަހުގެ 23 ވަނަ ދުވަހު ކަމަށް ފުލުހުން ބުނެއެވެ.
ޝަމްނާޒްގެ މައްޗަށް ކުރެވޭ ސިހުރުގެ ތުހުމަތުތަކާއި ގުޅޭގޮތުން ސުވާލުކުރުމުން ފުލުހުން އެކަން ދޮގުކޮށްފައި ނުވާއިރު ފުލުހުން ވިދާޅުވީ، ޝަމްނާޒްއާއި އިތުރު ދެ މީހެއް ހިމެނޭ ގޮތުން ފުލުހުން ދަނީ މައްސަލައެއް ތަހުގީގު ކުރަމުން ކަމަށެވެ.
މާލޭ ސިޓީ ކައުންސިލްގެ ހެންވޭރު ދެކުނު ދާއިރާގެ ކައުންސިލަރުގެ މަގާމުގައި ހުންނެވި ޝަމްނާޒު އެ މަގާމުން އިސްތިއުފާދެއްވީ ރައީސް މުއިއްޒު ވެރިކަމާ ހަވާލުވެވަޑައިގަތުމުންނެވެ. އެއަށް ފަހު އޭނާ އައްޔަންކުރެއްވީ ރައީސްގެ ރަސްމީ ގެކޮޅު، މުލިއާގޭގެ ސްޓޭޓް މިނިސްޓަރުގެ މަގާމަށެވެ. ފަހުން ވަނީ އޭނާ އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރަކަށް ބަދަލުކުރައްވައިފައެވެ.
