ދައުލަތުގެ ދަރަނި ބެލެހެއްޓުމަށްޓަކައި، ދައުލަތުގެ ދަރަންޏާ ބެހޭ ބިލު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފިއެވެ.

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފައިވާ ބިލުގައި ދައުލަތުގެ ދަރަނި ބެލެހެއްޓުމަށްޓަކައި ފިނޭންސް މިނިސްޓްރީގެ ދަށުން ހާއްސަ އިދާރާއެއް ހަދަން ޖެހޭނެ ކަމަށް ބަޔާންކޮށް ހިމަނާފައިވެއެވެ.

ފުނަދޫ ދާއިރާގެ މެންބަރު މުހައްމަދު މަމްދޫހު ހުށަހެޅުއްވި މިބިލަކީ ދައުލަތުން ދަރަނި ނަގައި ބަލަހައްޓަނީ ގައުމުގެ އިގްތިސޯދަށާއި މުސްތަގްބަލުގެ ޖީލުތަކަށް ކުރާނެ އަސަރު ވަޒަންކުރެވި ގައުމުގެ އިގްތިސޯދީ ފުދުންތެރިކަމާއި ދައުލަތުގެ މާލިއްޔަތުގެ ނިޒާމް ދިގު މުއްދަތަކަށް ދެމެހެއްޓޭނެ ގޮތެއްގެ މަތިންކަން ކަށަވަރުކުރުމަށްޓަކައި ކަމަށް ބިލުގެ ބަޔާނުގައި ވެއެވެ.

މީގެ އިތުރުން މި ބިލުގައި ބަޔާންކޮށްފައިވާ ގޮތުގައި މިބިލުން ދައުލަތުގެ ދަރަނި ނެގުމާއި ބެލެހެއްޓުމާއި ލޯކަލް ކައުންސިލްތަކާއި ދައުލަތުގެ ކުންފުނިތަކުން ނަގާ ދަރަންޏަށް ދައުލަތުން ސޮވްރިން ގެރެންޓީ ދޫކުރުމާއި ދައުލަތުގެ ދަރަންޏާ ގުޅޭ މައުލޫމާތު ހާމަކުރުމާއި ރިޕޯޓުކުރުމާއި މޮނިޓާކުރެވޭ އުސޫލުތައް ވެސް ހިމެނިފައިވާނެއެވެ.

އެގޮތުން ބަލާއިރު، މިއުސޫލުތަކުގެ ތެރޭގައި ދައުލަތުގެ ނަމުގައި ދަރަނި ނަގާނެ ގޮތާއި ދަރަނި ނެގުމުގައި އަމަލުކުރާނެ އުސޫލުތަކާއި ދަރަނި ނެގުމުގެ ބޭނުންތައް ބަޔާންކޮށްފައިވާއިރު، ދައުލަތުގެ ނަމުގައި ދަރަންޏަށް ފައިސާ ނަގަންޏާ އެ ހުށަހެޅުމެއް ހުށަހަޅަން ވާނީ ސީދާ ފިނޭންސް މިނިސްޓަރަށް ކަމަށާއި ދަރަންޏާ ގުޅޭ ބާރު ލިބިފައިވަނީ ފިނޭންސް މިނިސްޓަރަށް ކަމަށް ވެސް މިބިލުގައި ބަޔާންކޮށްފައިވެއެވެ.

މީގެ އިތުރުން،  ދަރަނި ބެލެހެއްޓުމަށްޓަކައި ހަދާ އޮފީހުގެ އެހީތެރިކަމާ އެކު، ކޮންމެ މާލީ އަހަރެއްގައި ވެސް ދައުލަތުގެ ދަރަނީގެ ސްޓްރެޓަޖީއެއް އެކުލަވާލާނެ ކަމަށާއި ކޮންމެ އަހަރެއްގެ ވެސް ޖުލައި މަހުގެ 15 ވަނަ ދުވަހުގެ ކުރިން ވަޒީރުންގެ މަޖިލީހުގެ މަޝްވަރާގެ މަތިން ފާސްކޮށް ރައްޔިތުންގެ މަޖިލީހަށް ހުށަހަޅައި އާންމުކުރެވޭނެ ކަމަށްވެސް ބަޔާންކޮށްފައިވެއެވެ.

ފުނަދޫ ދާއިރާގެ މެންބަރު ހުށަހަޅާފައިވާ ދައުލަތުގެ ދަރަންޏާއި ބެހޭ މި ބިލު ފާސްވެ ގާނޫނަކަށް ވެއްޖެ ނަމަ ހަ މަސް ދުވަހުގެ ތެރޭ ދަރަނި ބެލެހެއްޓުމަށްޓަކައި އިދާރާއެއް އުފައްދަންވާނެއެވެ.

ދައުލަތުގެ ދަރަނި ބަލަހައްޓާ އޮފީހުގެ ބައެއް ޒިންމާތައް:

• ދައުލަތުން ނަގާފައިވާ ދަރަންޏާއި ދޫކޮށްފައިވާ ސޮވްރިން ގެރެންޓީތަކާއި ދޫކޮށްފައިވާ ލޯނުތަކުގެ ރެކޯޑުތައް ބަލަހައްޓައި ރެކޯޑުކުރުމާއި ބެލެހެއްޓުން
• ރާއްޖޭގެ ކްރެޑިޓް ރޭޓިން އެއްވަރެއްގައި ހިފެހެއްޓުމަށްޓަކައި ކުރަން ޖެހޭ މަސައްކަތްކުރުން
• ދައުލަތުގެ ދަރަނި ދައްކަން ޖެހޭ މުއްދަތުތަކުގައި ދެއްކުމަށްޓަކައި ކުރަން ޖެހޭ މަސައްކަތްކުރުން