މިފްކޯއަށް މަސްވެރިން ކިރަ މަހަށް ދޭންޖެހޭ ފައިސާގެ ތެރެއިން 52 މިލިއަން ރުފިޔާ މިއަދު ދޫކުރަން ސަރުކާރުން މަސައްކަތް ކުރަމުން އަންނަކަމުގެ މައުލޫމާތު ލިބިފައިވާކަމަށް ސަރުކާރުގެ މަސް ކުންފުނި މިފްކޯން ބުނެފިއެވެ.
މިފްކޯއިން ބުނެފައިވަނީ އެކަން ސަރުކާރުން ރަސްމީކޮށް އެކުންފުންޏަށް އަދި އަންގައިފައި ނުވި ނަމަވެސް މަސްވެރިންނަށް ނުދެވި ހުރި 52 މިލިއަން ރުފިޔާ މިއަދު ދެއްކުމުގެ މަސައްކަތް ސަރުކާރުން ކުރަމުން އަންނަ ކަމުގެ މައުލޫމާތު ލިބިފައިވާކަމަށެވެ.
އަދި މިއަދު ސަރުކާރުގެ ފަރާތުން އެކަން އިއުލާނުކުރުން ވެސް އެކަށީގެން ވާކަމުގައި އެ ކުންފުނިން ބުނެއެވެ.
މަސްވެރިންނަށް ފައިސާ ދިނުން ލަސްވާ ކަމަށް ބުނެ، އައްޑޫ ހުޅުމީދޫގައި ހުންނަ އައްޑޫ ފިޝަރީޒް ކޮމްޕްލެކްސްގައި މަސްވެރިން ދަނީ މިދިޔަ ހޮނިހިރު ދުވަހުން ފެށިގެން އިހުތިޖާޖުކުރަމުންނެވެ.
މި އިހުތިޖާޖުގެ ތެރެއިން މަސްވެރިން ވަނީ އެ ކޮމްޕްލެކްސްގެ އޮޕަރޭޝަން އެއްކޮށް ހުއްޓުމަކަށްވެސް ގެނެސްފައެވެ.
މިކަމާއި ގުޅިގެން މިފްކޯއިން ބުނެފައިވަނީ އެ ކުންފުނީގެ މަސައްކަތަށް ހުރަސް އަޅާ މަސްދޯނިތަކުން ތިން މަސްވަންދެން މަސްކިރުން މެދު ކަނޑާލާނެކަމަށެވެ.
އެގޮތުން މިވަގުތު ކުންފުނި އޮތީ މާލީގޮތުން ބޮޑު ބުރަ ހާލަތެއްގައި ކަމަށާއި މިސްރާބު ބަދަލު ކުރަންޖެހޭ ކަމަށް މިފްކޯ އިން ވެސް ވަނީ ހާމަކޮށްފައެވެ.
މިފްކޯގެ މާލީ ހާލަތާއި ގުޅޭގޮތުން އެ ކުންފުނިން ނެރުނު ބަޔާނެއްގައި ވިދާޅުވީ، މިފްކޯގެ އޮޕަރޭޝަންތައް ކުރިއަށް ގެންދިއުމަށް މިވަގުތަށް ބޭނުންވާ ހަކަތައާއި ގާބިލްކަން ކުންފުނީގައި އެބަހުރި ކަމަށެވެ.
ޕީ.ބީ.ސީ ބޯޑުން މިހާރު ވަނީ މިފްކޯގެ ސީއީއޯކަމަށް ކުރިމަތިލުމަށްވެސް ހުޅުވާލައިފައެވެ.
