ގްރޫޕްހަދައިގެން ކުޑަކުއްޖަކަށް އަނިޔާ ކުރި މައްސަލައެއް ފެންމަތި ވެއްޖެއެވެ.
މީސް މީޑިޔާގައި އާންމުވަމުންދާ މި ވީޑިއޯއިން ފެންނަ ގޮތުގައި ގްރޫޕްހަދައިގެން ކުޑަކުއްޖަކަށް އަނިޔާކުރާ އިރު އެ ކުއްޖާ ބިންމައްޗަށް ވައްޓާލައި ކޮޅުފައިންވެސް ޖަހާ މަންޒަރު ފެނެއެވެ.
ވީޑިއޯއިން ފެންނަ ގޮތުގައި ފުރާވަރުގެ ކުދިންތަކެއް ހިމެނޭ މި ގްރޫޕުން އެ ކުއްޖާއަށް އަނިޔާ ކުރާއިރު ވީޑިއޯކުރަން ހުރި ފަރާތް ފިޔަވައި އެހެން ކުއްޖެއްވެސް ކައިރީގައި ހެމުން ހަރަކާތްތެރިވެއެވެ.
ކުއްޖާއަށް އަނިޔާކުރި ފަރާތުން ވަނީ އެ ކުއްޖާގެ މޫނުމަތީގައިވެސް ތަޅައިފައެވެ.
އަދި ތަދުވެގެން އެ ކުއްޖާ ރޯ އަޑުވެސް ވީޑިއޯއިން ފެނެއެވެ.
މީގެ އިތުރުން އަނިޔާ ކުރި ފަރާތުން ވަނީ ” ބެހިއްޖިޔާ ކީއްކުރާނީ ” މި ފަދަ ސުވާލެއްވެސް އެ ކުއްޖާއާ ކޮށްފައެވެ.
ވުމާއެކު ބެލެވެނީ މިއީ ބުލީކުރުމުގެ ކަމެއްގައި ހިނގި ހާދިސާއެއް ކަމަށެވެ.
މިކަމާއި ގުޅިގެން ފުލުހުން ވިދާޅުވި ހިޔާ ފްލްޓެއްގެ ކޮރިޑޯގައި ކުޑަކުއްޖަކަށް އަނިޔާ ކުރި މައްސަލައެއް މި މަހުގެ 19 ވަނަ ދުވަހު ފުލުހުންނަށް ލިބިފައިވާކަމަށާއި އެ މައްސަލަ ފުލުހުން ތަހުގީގު ކުރަމުން އަންނަ ކަމަށެވެ.
ކުޑަކުދިން ގޭން ހަދައިގެން ކުޑަކުދިންނަށް އަނިޔާކުރުމުގެ މައްސަލަތައް މީގެ ކުރިންވެސް ފެންމަތިވެފައި ވެއެވެ.
ހޯމް މިނިސްޓަރ އަލީ އިހުސާން މި ހަފްތާ ތެރޭގައި ހާމަކުރެއްވި ގޮތުގައި، ކުށުގެ ވެށީގައި ހަރަކާތްތެރިވާ ކުރިން އިސްލާހްކުރުމަށް ސަރުކާރުން ގާއިމްކުރާ “ހޯޕް އައިލެންޑް” އިން ރިހެބިލޭޝަން ދޭންޖެހޭ 400 އެއްހާ ކުދިން ރާއްޖޭގައި އެބަ ތިއްބެވެ.
