ވެލާނާ އިންޓަރނޭޝަނަލް އެއަރޕޯޓުގެ އައު ފަޔަރ ސްޓޭޝަން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ރަސްމީކޮށް އިއްޔެ ހުޅުއްވައިދެއްވައިފިއެވެ.
މި ކަމަށް ޚާއްޞަކޮށް އެ އެއާޕޯޓުގައި ބޭއްވި ރަސްމިއްޔާތު ފަށާފައި ވަނީ މޯލްޑިވްސް އެއާޕޯޓް ކޮންޕެނީ ލިމިޓެޑް (އެމްއޭސީއެލް)ގެ ކުރީގެ ފަޔާ ޗީފް އަލް މަރުހޫމް އަޙްމަދު ފަޔާޒުގެ ހަނދާނުގައި ގެނެވުނު ޚާއްޞަ ސުކޫތަކަށް ފަހުގައެވެ.
މި ރަސްމިއްޔާތުގައި ޗީފް އޮފް ޑިފެންސް ފޯސް މެޖާރ ޖެނެރަލް އިބްރާހީމް ހިލްމީ، އެމް.އޭ.ސީ.އެލްގެ ސީ.އީ.އޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދުގެ އިތުރުން ކުންފުނީގެ އިސްބޭފުޅުންނާއި ސަރުކާރުގެ ވުޒާރާތަކާއި ކުންފުނިތަކުން އަދި ދައުލަތުގެ އިދާރާތަކުގެ އިސްބޭފުޅުން ވަނީ ބައިވެރިވެވަޑައިގެންފައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވަނީ، ވެލަނާ އިންޓަރނޭޝަނަލް އެއަރޕޯޓުގެ ފަޔަރ ފައިޓަރުން ކުރައްވާ ޤައުމީ ޚިދުމަތް ފާހަގަކުރައްވައި އެ ބޭފުޅުންނަށް ޝުކުރު އަދާކުރައްވާފައެވެ. އަދި ފަޔާ ފައިޓަރުންގެ މަސައްކަތަށް ބޭނުންވާ ޒަމާނީ ވަސީލަތްތައް ފުރިހަމަކޮށްދިނުމަށް ސަރުކާރުން އަބަދު ވެސް މަސައްކަތް ކުރާނެކަމަށް ނައިބު ރައީސް ވަނީ ވިދާޅުވެފައެވެ.
އެމް.އޭ.ސީ.އެލްގެ ސީ.އީ.އޯ އަދި މެނޭޖިންގް ޑިރެކްޓަރ އިބްރާހީމް ޝަރީފް މުޙައްމަދުގެ ވާހަކަފުޅުގައި އެއާޕޯޓްގެ ތަރައްޤީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެ މަނިކުފާނުގެ ސަރުކާރުން ދެއްވާ ޚާއްޞަ ސަމާލުކަމާ ދުރު ވިސްނުންފުޅު ފާހަގަކުރައްވައި އެ ކަމަށްޓަކާ އެ ދެ ބޭފުޅުން ވަނީ ރައީސްއަށާއި ސަރުކާރަށް ޝުކުރު އަދާކުރައްވާފައެވެ. މީގެ އިތުރުން ޝަރީފްގެ ވާހަކަފުޅުގައި ފަޔަރ ފައިޓަރުންގެ ޓީމްގެ ޤާބިލްކަމާއި އަލަށް ހުޅުވުނު ފަޔަރ ސްޓޭޝަނާއެކު ހާދިސާތަކަށް ރެސްޕޮންޑް ކުރެވޭ ވަގުތާއި ފެންވަރު ރަނގަޅުވެގެންދާނެކަން ފާހަގަ ކުރެއްވިއެވެ. އަދި ވެލާނާ އިންޓަރނޭޝަނަލް އެއަރޕޯޓަކީ މި ސަރަޙައްދުގައި ވެސް އަންހެން ފަޔަރ ފައިޓަރުން ޚިދުމަތާ ގުޅުނު ފުރަތަމަ އެއަރޕޯޓްކަން ފާހަގަކުރައްވައި އެ ބޭކަނބަލުންނަށް ޝަރީފް ވަނީ މަރުޚަބާއާއި ޝުކުރު އަދާކުރައްވާފައެވެ.
ވެލާނާ އިންޓަރނޭޝަނަލް އެއަރޕޯޓުގެ ސަލާމަތާއި ރައްކާތެރިކަމަށް ސަރުކާރުން ޚާއްޞަ އިސްކަމެއްދެއްވައެވެ. އެގޮތުން އެއާޕޯޓުގެ ސަލާމަތީ ކަންކަން އިތުރަށް ވަރުގަދަކުރުމަށް އައު ފަޔަރ ސްޓޭޝަނެއް މި ވަނީ ހުޅުވާފައެވެ. އަލަށް ތަރައްޤީކޮށްފައިވާ ރަންވޭއާއި އެއަރޕޯޓުގެ އިތުރު ސަރަޙައްދުތައް ސަލާމަތީގޮތުން ވަކި ސްޓޭންޑަޑެއްގައި ބެހެއްޓުމަކީ ބައިނަލް އަގްވާމީ ވައިގެ ދަތުރުފަތުރާ ބެހޭ އިދާރާ (އައިކާއޯ) އަދި ރާއްޖޭގެ ސިވިލް އެވިއޭޝަން ޤާނޫނުތަކުން ވެސް ލާޒިމުކުރާކަމެކެވެ.
އައު ފަޔާ ސްޓޭޝަނުގައި ބޭނުންކުރާނީ ޒަމާނީ ވަސީލަތްތަކެވެ. އެ ސްޓޭޝަނަކީ އިންޓަނޭޝަނަލް ސިވިލް އޭވިއޭޝަން އޮގަނައިޒޭޝަން އައިކާއޯގެ އެއާޕޯޓް ފަޔާ ރެސްކިއުގެ ކެޓަގަރީ ނުވައެއްގެ އެއާޕޯޓު ޝަރުތުތައް ފުރިހަމަވެފައިވާ އަދި އޭރޯޑްރޯމް ކެޓަގަރީ 10 ގެ އަލިފާން ނިއްވުމުގެ މިންގަނޑުތަކާ އެއްގޮތަށް ހުޅުވިގެންދިޔަ ސްޓޭޝަނެކެވެ. 2230 އަކަމީޓަރުގެ ސަރަހައްދެއްގައި އިމާރާތްކޮށްފައިވާ މި ފެސިލިޓީއަކީ ރަންވޭ އިރުމަތީ އޭޕްރަން، ވޯޓާ އޭރޯޑްރޯމްގެ މައި ރެސްޕޮންޑަރެއްގެ ގޮތުގައި މަސައްކަތްކުރާނެ ފެސިލިޓީއެވެ. އައު ފަޔަރ ސްޓޭޝަންގައި މުވައްޒަފުންނާއި، ތަމްރީންތަކަށް އަދި ކޮންޓްރޯލް ސެންޓަރު ހިމެނޭހެން 2 ފަންގިފިލާގެ އިމާރާތެއް ވަނީ ގާއިމުކޮށްފައެވެ.
އައު ފަޔަރ ސްޓޭޝަން ހުޅުވައި ޚިދުމަތްދޭން ފެށި ނަމަވެސް، ކުރީގައި ބޭނުންކުރާ ފަޔަރ ސްޓޭޝަންގެ ޙިދުމަތް ވެސް ދެމުން ދާނެއެވެ. އެގޮތުން ޓެކްސީވޭ އަދި ހުޅަނގުފަރާތު އޭޕްރަން، އަދި އޮފީސް އިމާރާތްތަކުގެ އިމަރޖެންސީގައި ހަރަކާތްތެރިވާނީ ކުރީގެ ފަޔަރ ސްޓޭޝަނުންނެވެ.
އަލިފާން ނިއްވާ 2 އުޅަނދާއި އަލިފާނުގެ ހާދިސާތަކުގައި ވެހިކަލްތަކަށް އަވަހަށް ފެން ފޯރުކޮށްދެވޭނެހެން ޤާއިމުކޮށްފައިވާ ފެން ޓޭންކުތަކާއި، ކޮމާންޑް ވެހިކަލްއަކާއި، ކަނޑުގެ ސަރަޙައްދުގައި ހިނގާފާނެ ޙާދިސާތަކުގެ ޙާލަތުގައި ބޭނުންކުރާނެ ކަނޑުގެ 2 އުޅަނދު ވެސް މި ސްޓޭޝަންގައި ވަނީ ޤާއިމުކޮށްފައެވެ.
