ކޮޕާ އެމެރިކާ 2024 ގެ ގެްރޫޕް ސްޓޭޖުގެ ދެވަނަ މެޗުން ކޮސްޓަރިކާ އަތުން މޮޅުވެ ކޮލޮމްބިއާ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.
ހުކުރު ދުވަހުގެ ރޭ ކުޅުނު މި މެޗުން ކޮލޮމްބިއާ މޮޅުވެފައވަނީ 3-0 ގެ ނަތިއްޖާއަކުނެވެ. އަދި މި ނަތީއްޖާ އާއެކު އެ ޓީމު އެއްވެސް މެޗަކުން ބަލިނުވާތާ 25 މެޗު ވެފައިވާއިރު, އަދި 2 މެޗު ހިފަހަށްޓާލެވިއްޖެނަމަ އެމީހުންގެ ގައުމީ ރިކޯޑެއް ގާއިމުކުރެވޭނެއެވެ.
މި މެޗުގައި ކޮލޮމްބިއާއަށް ގޯލުތައް ކާމިޔާބު ކޮށްދިނީ ލިވަޕޫލްގެ ތަރި ލުއިސް ޑިއާޒް, ޑޭވިންސަން ސެންޗޭޒް އަދި ކޯޑޮބާއެވެ. މުބާރާތުގައި މިހާތަނަށް ކުޅުނު ދެމެޗުންވެސް މޮޅުވެފައިވުމުން މިހާރު ކޮލޮމްބިއާވަނީ ކުއާޓާ ފައިނަލްގެ ޖާގަ ކަށަވަރުކޮށްފައެވެ.
ކޮލޮމްބިއާގެ ކޯޗު ނެސްޓޯ ލޮރެންޒޯ މަގާމާއި ހަވާލުވިފަހުން އަދި އެއްވެސް މެޗަކުން އެޓީމު ބަލިވެފައިނުވާއިރު 20 މެޗަކުން މޮޅުވެ 5 މެޗަކުން އެއްވަރުވެފައިވެއެވެ. އޭގެ ތެރޭގައި ސްޕެއިން, ޖާމަނީ, ޖަޕާން އަދި އެމެރިކާވެސް ބަލިކޮށްފައިވެއެވެ. މި މެޗުތަކުގައި އެންމެ ރަނގަޅު ކުޅުމެއް ދައްކާފައިވާ ކުޅުންތެރިޔަކީ ލިވަޕޫލްގެ ތަރި ޑިއާޒްކަންވެސް ފާހަނގަ ކޮށްލެވެއެވެ.
ގްރޫޕުގެ އެއްވަނަ މަގާމު ކަށަވަރުކުރުމަށް އެ ގްރޫޕުގެ ފަހު މެޗުގައި ކޮލޮމްބިއާ ނުކުންނާނީ ބްރަޒިލްއާއި ދެކޮޅަށެވެ.
