ގައުމުގެ އިޤްތިޞާދީ ހާލަތު މިހާރު އޮތީ ރަނގަޅު ހާލަތެއްގައިކަމަށާއި ހަމައެކަނި އޮތް މައްސަލައަކީ މި ސަރުކާރަށް އިޤްތިޞާދު ހިންގުމަށް ނޭނގުމުގެ މައްސަލަކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ރާއްޖޭގެ މާލީ ހާލަތާ ގުޅިގެން އިދިކޮޅު އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ ގިނަ ބަޔަކަށް އޮޅިފައި ވީ ނަމަވެސް ރާއްޖޭގެ އިޤްތިޞާދީ ހާލަތު އޮތީ ރަނގަޅު ހާލަތެއްގައިކަމަށް ފޯކާސްޓުތަކުން ދައްކާކަމަށެވެ. އެގޮތުން އެމްޑީޕީން 2024 ވަނަ އަހަރަށް ބަޖެޓު ހުށަހެޅި އިރު އިޤްތިޞާދީ އުފެއްދުންތެރިކަން 5.5 ޕަސެންޓް އިތުރުވާނެކަމަށް ވާނެކަމަށް އަންދާޒާ ކޮށްފައިވާނެކަމަށާއި ނަމަވެސް މިހާރު އެ އަދަދު 4.9 ޕަސެންޓަށް ދަށްވެފައިވާކަމަށް އަމީރު ވިދާޅުވިއެވެ.
ސަރުކާރުގެ މާލީ ހާލަތު ގޯސްވެ އިސްލާހީ ފިޔަވަޅުތަކެއް އަޅުއްވާނެކަމަށް ރައީސް ޑރ. މުޙައްމަދު މުޢިއްޒު ދާދި ފަހުން ވަނީ އިއުލާން ކުރައްވާފައެވެ. މި ސަރުކާރުގެ ވެރިން ވިދާޅުވަމުންދާ ގޮތުގައި މި ހާލަތަށް ޤައުމު ވެއްޓުނީ މިދިޔަ ސަރުކާރުން އަމަލުކުރި ގޮތުންނެވެ.
ނަމަވެސް އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމުގައި އެ ވާހަކަތަކަށް ރައްދު ދެއްވަމުން އަމީރު ވިދާޅުވީ އޭރު ރާއްޖޭގެ އިޤްތިޞާދަށް ދިމާވީ ބޮޑު ބަލިމަޑުކަމެއްކަމަށާއި އެ ކަންކަމަށް “ބޭސްފަރުވާ ކުރީ ސައިޑް އިފެކްޓްތައް ހުންނާނެކަން” އެނގި ތިބެކަމަށެވެ. ނަމަވެސް އެ “ސައިޑް އިފެކްޓްތަކަށް” ބޭސްފަރުވާ ކުރަން މިއަދު ތިބީ އެހެން ބައެއްކަމަށް އަމީރު ވިދާޅުވިއެވެ.
މީގެ އިތުރުން މި ސަރުކާރުގެ ޑެޕިއުޓީ މިނިސްޓަރުން އިންޑިއާގެ ބޮޑުވަޒީރު ނަރެންދްރަ މޯދީއާ ގުޅުވައި ދެއްކެވި ވާހަކައާ ގުޅިގެން ވެސް މި ހާލަތު އައުމަށް މެދުވެރިވިކަމަށް އަމީރު ވިދާޅުވިއެވެ. އަމީރު ވަނީ އެއީ ރާއްޖެއަށް ދެވުނު ބޮޑު ގެއްލުމެއްގެ ގޮތުގައި ސިފަކުރައްވައިފައެވެ.
