ކީރިތި ޤުރުއާނާއި ބެހޭ ޤައުމީ މަރުކަޒުގެ ހިންގުން ވަކި އިމާރާތަކަށް ބަދަލުކުރުމަށް ނިންމައިފިއެވެ.
މިކަން ހާމަކޮށް ޤުރުއާން ކިޔެވުމުގެ 36 ވަނަ ޤައުމީ މުބާރާތް އިފުތިތާހު ކުރަން ރޭ ބޭއްވި ޖަލްސާގައި އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ، ކީރިތި ޤުރުއާނާއި ބެހޭ މަރުކަޒު ހިންގުމަށް މި ސަރުކާރުގައި ހާއްސަ ބިނާއެއް ޤާއިމުކުރަން ނިންމާފައިވާ ކަމަށެވެ.
އަދި އެ ބިނާގެ މަސައްކަތް މި ދައުރު ނިމުމުގެ ކުރިން ފަށާނެކަމުގެ ޔަގީންކަން ވަޒީރު ވަނީ އަރުވައިފައެވެ.
މީގެ އިތުރުން ވަޒީރުގެ ވާހަކަފުޅުގައި ވިދަޅުވީ، މީގެ 36 އަހަރު ކުރިން ފެށި ކީރިތި ޤުރުއާން ކިޔެވުމުގެ ޤައުމީ މުބާރާތަކީ ވަރަށް ވަރުގަދަ މަދަރުސާއެއް ކަމަށާއި އެ މަދަރުސާއިން ތަމްރީންވެފައިވާ އެތައް ދަރިވަރުންތަކެއް މިއަދު ދުނިޔޭގެ އެކި ކަންކޮޅުތަކުގައި ކުރިއަށްދާ ތަފާތު އެކި ޤުރުއާން މުބާރާތްތަކުގައި ރާއްޖެ ތަމްސީލުކުރަމުންދާ ކަމަށެވެ.
ކީރިތި ޤުރުއާނާއި ބެހޭ ޤައުމީ މަރުކަޒު މިހާރު ހިންގަމުން އަންނަނީ ކިންގް ސަލްމާނު މިނިސްކިތުގައެވެ.
ކީރިތި ޤުރުއާނާ ބެހޭ މަރުކަޒުގެ ގޮފިތަކެއް ބައެއް އަތޮޅުތަކުގައި ވެސް ހިންގައެވެ.
