މިފްކޯއިން މަސް ގަންނަމުންދާ އަގަށް ބަދަލުތައް ގެނައުމާއި ގުޅިގެން ތެލުގެ އަގު ހެޔޮ ކުރުމަށް ބޮޑު ކަންނެލި މަސްވެރިންގެ ޔޫނިއަންއިން ގޮވާލައިފިއެވެ.
މިފްކޯއިން ވަނީ މާދަމާއިން ފެށިގެން މަސްވެރިން އަތުން މަސް ގަންނަ އަގު ކުޑަކުރަން ނިންމާފައެވެ. މިއަދު މިފްކޯއިން ނެރެފައިވާ ބަޔާނެއްގައި ހާމަކޮށްފައިވާ ގޮތުގައި މަސްވެރިންގެ އަތުން ގަންނަ މަހަށް ދޭންޖެހޭ ފައިސާ ގަވާއިދުން ދެވޭނެ އިންތިޒާމެއް ހަމަޖެއްސުމަށްޓަކައި އަންނަ މަހުގެ އެއްވަނަ ދުވަހުން ފެށިގެން މިފްކޯއިން މަސްވެރިން އަތުން މަސްގަންނަމުންދާނީ ބައިނަލްއަޤްވާމީ ބާޒާރުގައި ގަނޑުކުރި ކަޅުބިލަމަހުގެ އަގު ހުރި މިންވަރަށާއި މަސް ގަނެ އެކްސްޕޯޓުކުރުމަށް ހިނގާނޭ ޚަރަދުތަކަށް ބަލައި ކޮންމެ ހަފްތާއަކު ކަނޑައަޅާ އަގައްގައެވެ.
މަސްވެރިން އަތުން މަސް ގަންނަ އަގު ކުޑަކުރުމަށް މިފްކޯއިން ނިންމުމާއި ގުޅިގެން ބޮޑު ކަންނެލި މަސްވެރިންގެ ޔޫނިއަންއިން ބުނީ، މިފްކޯ ހިންގުމުގައި ހިޔާނާތްތެރިވި ވެރިންނަށް ފިޔަވަޅު އަޅަން ޖެހޭ ކަމަށާއި މިފްކޯ ދަރަނިވެ މަސްވެރިޔާއަށް ލިބޭ އާމްދަނީ ދަށްކޮށްފައިވަނީ ވެރިންގެ އިހުމާލުން ކަމަށެވެ. މިއާއިއެކު ބޮޑު ކަންނެލި މަސްވެރިންގެ ޔޫނިއަންއިން ވަނީ މަސް ގަންނަ އަގަށް ގެނެވުނު ބަދަލާއެކު ތެލުގެ އަގު ހެޔޮ ކުރަން ވެސް ގޮވާލާފައެވެ.
ބޮޑު ކަންނެލި މަސްވެރިންގެ ޔޫނިއަންއިން ތެލުގެ އަގު ހެޔޮ ކުރުމަށް ގޮވާލައިފައިވާއިރު، މިމަހުގެ 13 ވަނަ ދުވަހު ވަނީ ހުޅުމާލެއިން މަސްވެރިންނަށް ވިއްކާ ޑީސެލްގެ އަގު ޝެޑުތަކުން ވިއްކާ އަގަށް ހެޔޮކޮށްފައެވެ.
އެގޮތުން ކަނޑުގެ ވަސީލަތްތަކާއި ބެހޭ ވުޒާރާއިން ވިދާޅުވެފައިވާ ގޮތުގައި މިހާރު ވާނީ ޑީސަލް ލީޓަރަކުން 70 ލާރި އަދި ޕެޓްރޯލް ލީޓަރަކުން 35 ލާރި ވަނީ ކުޑަކޮށްފައެވެ. މި ބަދަލާއިއެކީ ޕެޓްރޯލް ލީޓަރެއް 12.98 ރުފިޔާއަށް އަދި ޑީސަލް ލީޓަރެއް 13.92 ރުފިޔާއަށް ލިބޭނެ ކަމަށް އެވުޒާރާއިން ބުނެފައިވެއެވެ.
