ސެންޓަރ ފޮރ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ)ގެ މާލޭގެ އިމާރާތުގައި އަލުން ކިޔަވައިދޭން ފަށަން ނިންމާފައިވާކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ފޭސްބުކްގައި ކުރެއްވި ޕޯސްޓެއް މެދުވެރިކޮށެވެ. އެ މަނިކުފާނު ވިދާޅުވި ގޮތުގައި މި ހިނގާ 2024 ވަނަ އަހަރު ގްރޭޑް 10ގެ 1700 ދަރިވަރުން މާލޭގެ އެކި ސްކޫލްތަކުގައި ތަޢުލީމު ހާސިލުކުރެއެވެ. ނަމަވެސް މާލޭގައި އޭލެވެލަށް ކިޔަވައިދޭނެ ސަރުކާރުގެ ސްކޫލެއް ނެތުމަކީ އެ ކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރަމުންދާ ކަމެއްކަމަށް މިނިސްޓަރ ފާހަގަކުރެއްވިއެވެ. އެހެންކަމުން މި އަހަރުގެ ސެޕްޓެމްބަރު މަހު އޭލެވެލްގެ ކިޔެވުން ފެށުމުގެ ކުރިން މާލޭގައި ކުރިން ހިންގި ސީއެޗްއެސްއީ އިމާރާތުގައި އަލުން އޭލެވެލްއަށް ކިޔެވޭނެ އިންތިޒާމު ހަމަޖައްސަވާނެކަމަށް މިނިސްޓަރ ވިދާޅުވިއެވެ.
ސީއެޗްއެސްއީގެ މާލޭގެ އިމާރާތުގައި ކިޔެވުން ހުއްޓާލީ ނިމިދިޔަ އެމްޑީޕީގެ ސަރުކާރުގައެވެ. މާލެ ސަރަހައްދުގައި އޭލެވެލްއަށް ކިޔަވައިދޭ ސަރުކާރުގެ ހަމައެކަނި ސްކޫލަކަށް މިހާރު ހުރީ ހުޅުމާލޭގައި ހުރި ސީއެޗްއެސްއީގެ އިމާރާތެވެ. މާލޭގައި ސަރުކާރު ސްކޫލަކުން އޭލެވެލް ކިޔެވޭނެ އިންތިޒާމު ހަމަޖެހުމުން މާލެއިން ހުޅުމާލެއަށް ދަތުރުކުރާ ދަރިވަރުންގެ އަދަދު މަދުވެ، ގާތުން ތަޢުލީމު ފޯރުކޮށްދިނުމުގެ ސިޔާސަތު ތަންފީޒު ކުރެވިގެންދާނެކަމަށް ވެސް ޝަފީއު ވިދާޅުވިއެވެ.
“މާލޭގައި ސަރުކާރުގެ އޭލެވެލް ސްކޫލެއް ހުޅުވުމުން މާލެއިން ހުޅުމާލެއަށް ދަތުރުކުރާ އޭލެވެލް ދަރިވަރުންގެ އަދަދު މަދުވާނެ. އަދި، ގާތުން ތަޢުލީމު ފޯރުކޮށްދިނުމުގެ ސިޔާސަތު ތަންފީޒު ކުރެވި، އޭލެވެލްގެ ތަޢުލީމަށް ސަރުކާރުން ކުރާ ހޭދަ ވެސް މީހާރަށް ވުރެ ކުޑަކުރެވޭނެ” މިނިސްޓަރު ޝަފީއު ވިދާޅުވިއެވެ.
މާލޭގައި ހުރި ސީއެޗްއެސްއީގެ އިމާރާތުގައި އަލުން ކިޔަވައިދޭން ފެށިކަމުގައި ވިއަސް، ހުޅުމާލޭގައި ހުރި ސީއެޗްއެސްއީގެ އިމާރާތަށް އެއްވެސް ބަދަލެއް ނުގެންނާނެކަމުގެ ޔަގީންކަން މިނިސްޓަރ ވަނީ ދެއްވާފައެވެ.
