މިދިޔަ ހޮނިހިރު ދުވަހު ހިންގި އޮޕަރޭޝަންގައި ނުގަވައިދުން އުޅޭ 83 ބިދޭސީން ހޯދައިފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.
އިމިގްރޭޝަނުން ނެރުނު ބަޔާނެއްގައި ބުނީ ގަވާއިދާ ޚިލާފަށް ރާއްޖޭގައި އުޅެމުން އައި 1800އަށް ވުރެ ގިނަ ބިދޭސީން މިހާތަނަށް ފުރުވައިލައިފައިވާކަމަށެވެ.
ރައީސް ޑރ. މުޙައްމަދު މުޢިއްޒުގެ ވިސްނުންފުޅާ އެއްގޮތަށް، ގަވާއިދާ ޚިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް ކުރަމުންގެންދާ މަސައްކަތުގެ ތެރެއިން ހޮނިހިރު ދުވަހު މާލޭގައި ޚާއްޞަ އޮޕަރޭޝަނެއް ހިންގައިފައިވާކަން ވެސް އިމިގްރޭޝަނުން ހާމަކޮށްފައިވެއެވެ. މި ރެއިޑް އޮޕަރޭޝަނަކީ ކޮންޓްރޯލާ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދުގެ އިރުޝާދާ އެއްގޮތަށް މޯލްޑިވްސް އިމިގްރޭޝަނާއި މޯލްޑިވްސް ޕޮލިސް ސާވިސްއާ ގުޅިގެން މި ދައުރުގައި ހިންގުނު އެންމެ ބޮޑު ރެއިޑް އޮޕަރޭޝަންކަމަށް އިމިގްރޭޝަނުން ބުނެއެވެ.
މި އޮޕަރޭޝަނާ ގުޅޭގޮތުން އެކްސްގައި ކުރެއްވި ޕޯސްޓެއްގައި ޝަމްޢާން ވިދާޅުވީ، މި ޖޮއިންޓް އޮޕަރޭޝަންގެ ތެރެއިން ހިފަހައްޓާފައިވާ ބިދޭސީންގެ ތެރެއިން ޞައްޙަ ހުއްދައެއް ނެތި އަދި ހުއްދަ ދޫކުރެވިފައިވާ މަސައްކަތުގެ ބޭރުން އަމިއްލައަށް ވިޔަފާރި ކުރާ ފަރާތްތަކެއް ދެނެގަނެވިފައިވާކަމަށެވެ. އަދި ކަނޑައެޅިފައިވާ އުސޫލުގެ ތެރެއިން މި ފަރާތްތައް ރާއްޖެއިން ޑީޕޯރޓްކޮށް ފޮނުވާލެވޭނެކަމަށް ޝަމްޢާން ވިދާޅުވެފައިވެއެވެ.
ބިދޭސީންނާ ގުޅުންހުރި މައްސަލަތައް ޙައްލުކުރުމަށް މި ސަރުކާރުން ވަނީ ގިނަ މަސައްކަތްތަކެއް ފަށާފައެވެ. އޭގެ ދަށުން ހޮނިހިރު ދުވަހު ފެށި މި އޮޕަރޭޝަންގެ ބޭނުމަކީ، ޞައްޙަ ލިޔެކިޔުން ނެތި ރާއްޖޭގައި ޤަވައިދާ ޚިލާފަށް އުޅޭ ބިދޭސީން ހޯދާ، ޤަވައިދުން ބޭރުން ބިދޭސީން ރާއްޖޭގައި އުޅުން ހުއްޓުވުމެވެ.
