އައްޑޫ ހިތަދޫ އާއި ގުޅިފައިވާ ރަށްތަކުން ކަރަންޓުގެ ހިދުމަތް މެދުކެނޑިއްޖެ އެވެ.
މަގު ހެދުމުގެ މަސައްކަތް ކުރަމުން ދަނިކޮށް ކޭބަލަކަށް ގެއްލުން ވެގެން ހިތަދޫގެ ކަރަންޓު ސްޓޭޝަނާއި ގުޅިފައިވާ ރަށްތަކުން ކަރަންޓު ކެނޑިފައިވާކަމަށް ފެނަކަ ކޯޕަރޭޝަނުން ބުނީ ކަމަށެވެ.
“މިހާރު މައްސަލަ ހައްލު ކުރުމުގެ މަސައްކަތް ކުރަމުން އަންނަ އިރު ރައްޔިތުންނަށް ކުރިމަތި ވާނެ އުނދަގޫތަކަށް މައާފަށް އެދެމެވެ،” ފެނަކަ އިން ބުނެފައިވެއެވެ.
އައްޑޫގެ ގުޅިފައިވާ ރަށްތަކަށް ކަރަންޓުގެ ދެމެހެއްޓެނިވި ހައްލެއް ހޯދުމަށްޓަކައި ކަރަންޓް ނެޓްވޯކު އަޕްގްރޭޑު ކުރަން ވަނީ ޗައިނާގެ ޑޮންގްފަންގް އިލެކްޓްރިކް އިންޓަނޭޝަނަލް ކޯޕަރޭޝަންއާއި ހަވާލުކޮށްފައެވެ.
