މާލެއިން 119 ކިލޯގެ ޑްރަގް އާއި އެކު 2 މީހަކު އަތުލައިގަތް މައްސަލާގައި ކުށް ސާބިތުނުވެ ސަލާމަތްވި ދެ މީހުންގެ ތެރެއިން އެކަކުގެ ބައި އިސްތިއުނާފް ކުރަން ދައުލަތުން ނިންމައިފި އެވެ.
މިމައްސަލައަކީ 2021 ވަނަ އަހަރު ފުލުހުން މާލޭގައި ހިންގި އޮޕަރޭޝަނެއްގައި ޓެކްސީއެއްގެ ތެރެއިންނާއި ބައެއް ގޭގެއިން އަތުލައިގަތް 119 ކިލޯގެ ޑްރަގް މައްސަލާގައި ދައުލަތުން ގދ. ހޯޑެއްދޫ ގުލޭނޫރަންމާގޭ އަލީ ޒުބައިރާއި އެރަށު އިރުމަތީގޭ އަހުމަދު ސުނައިނާއި އެރަށު އަލޯރާ އަހުމަދު މުޖާހިދުގެ މައްޗަށް ދައުވާކުރި މައްސަލައެކެވެ.
މިދިޔަ މާޗް މަހު މިމައްސަލައިގައި ޙުކުމް ކުރައްވަމުން ކްރިމިނަލް ކޯޓުން ނިންމެވީ ދައުވާކޮށްފައިވާ ޒުބައިރުގެ މައްޗަށް ކުށް ސާބިތުވިޔަސް ދެން ތިބި ދެ މީހުންގެ މައްޗަށް ކުށް ސާބިތުނުވާ ކަމަށެވެ.
މިމައްސަލަ ދިރާސާ ކުރުމަށްފަހު ޕްރޮސެކިއުޓާ ޖެނެރަލްގެ އޮފީހުން ބުނީ އޭގެ ތެރެއިން ސުނައިނުގެ ބައި ހައި ކޯޓުގައި އިސްތިއުނާފް ކުރަން ނިންމާފައިވާ ކަމަށާއި މުޖާހިދުގެ ބައި އިސްތިއުނާފް ނުކުރަން ނިންމީ އޭނާގެ ބައި ހައި ކޯޓުން ކާމިޔާބުވެދާނެ ކަމަށް ނުބެލެވޭތީ ކަމަށެވެ.
ކްރިމިނަލް ކޯޓުން މިމައްސަލާގައި ދައުވާ ކޮށްފައިވާ ދެމީހެއްގެ މައްޗަށް ކުށް ސާބިތުނުވާ ކަމަށް ނިންމުމުން ފުލުހުން އެކަމާ މެދު ކަންބޮޑުވުން ފާޅުކޮށްފައިވާއިރު، ހޯމް މިނިސްޓަރާއި ފުލުހުންގެ އިސްވެރިން ކޯޓުގެ ހުރުމަތް ކެނޑި ކަމަށް ބުނެ އެ މައްސަލަ ބަލަން ކްރިމިނަލް ކޯޓުން ކުރިން ނިންމި އެވެ.
119 ކިލޯގެ މަސްތުވާތަކެތި އަތުލައިގަތް މައްސަލައިގައި ސުނައިނުގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ކަނޑައަޅާފައިވާ އިރު، މިހާރުވެސް ހައިކޯޓުގައި ސުނައިނުގެ މައްޗަށް ސާބިތުނުވި މަސްތުވާތަކެތީގެ އިތުރު އެހެން މައްސަލައެއް އިސްތިއުނާފު ކޮށްފައިވެއެވެ.
