-Advertisement-

-Advertisement-

ފަސޭހަކަމާއެކު ރޮމޭނިއާ ބަލިކޮށް ނެދަލެންޑްސް ކުއާޓާއަށް!

ޔޫރޯ 2024 ގެ ގަދަ 16 ވަނަ ބުރުގައި ނެދަލެންޑްސް އަދި ރޮމޭނިއާ ބައްދަލު ކުރި މެޗުން ފަސޭހަކަމާއެކު ނެދަލެންޑްސް މޮޅުވެ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

މި މެޗުން ނެދަލެންޑްސް މޮޅުވެފައިވަނީ 3-0 ގެ ނަތީއްޖާ އަކުންނެވެ. މި މެޗުގައި ނެދަލެންޑްސްގެ ގޯލުތައް ޖަހާފައިވަނީ ކޯޑީ ގަކްޕޯ އަދި ޑޮންޔެލް މާލެން އެވެ. މާލެން ވަނީ 2 ގޯލު ކާމިޔާބު ކޮށްދީފައެވެ.

ގްރޫޕް ސްޓޭޖުގައި އެޓީމު އޮތް ގްރޫޕުގެ ތިންވަނާގައި ނިންމާފައިވާ ނެދަލެންޑްސް ޓީމުން މި މެޗުގައި ރަނގަޅު ކުޅުމެއް ދައްކާފައިވާ އިރު އެޓީމުން ގޯލާ ދިމާލެއް 23 ޝޮޓެއް ފޮނުވާފައިވެއެވެ. އެހެން ނަމަވެސް އެޓީމު ފުރަތަމަ ހާފު ނިންމާލާފައިވަނީ އެންމެ ގޯލެއްގެ ތަފާތުން ލީޑުގައި އޮވެގެންނެވެ. އެ ގޯލަކީ ގަކްޕޯ މި މުބާރާތުގައި ޖަހައިދިން 3 ވަނަ ގޯލެވެ.

މެޗުގައި ނެދަލެންޑްސް އަށް ގޯލު ޖަހަން ގިނަ ފުރުސަތުތަކެއް ލިބިފައިވީ ނަމަވެސް އެ ފުރުސަތު ތަކުގެ ބޭނުން ހިފިފައި ނުވެއެވެ. މެޗުގެ ފަހު ދިހަ މިނުޓާ ހަމައަށް ވެސް އެންމެ ގޯލަކުން ލީޑުގައި އޮތުމުން ރޮމޭނިއާ އިން އުންމީދު ދޫކޮށްލާފައި ނުވެއެވެ. ނެދަލެންޑްސް އަށް ލީޑު ފުޅާކޮށްފައިވަނީ މެޗުގެ ފަހުކޮޅުގައި މާލެން ޖަހައިދިން 2 ގޯލުންނެވެ.

ކުއާޓާ ފައިނަލުގައި ނެދަލެންޑްސް ބައްދަލު ކުރާނީ އޮސްޓްރިއާ ނުވަތަ ތުރުކީ ވިލާތާއެވެ.

-Advertisement-

-Advertisement-

-Advertisement-

ގުޅުންހުރި

-Advertisement-