އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓަސް (އޯއޭސީޕީއެސް)ގެ ބައިނަލްއަގްވާމީ އެއްބަސްވުން ‘ސަމޯއާ އެގްރީމެންޓް’ގައި ރާއްޖެއިން ސޮއި ކުރީ އިސްލާމްދީނާއި ޤާނޫނުއަސާސީއާ ހިލާފުވާ ގޮތަށްކަމަށް ބުނެ ފެތުރޭ ވާހަކަތައް ސަރުކާރުން ދޮގުކޮށްފިއެވެ.
މި އެގްރިމަންޓުގައި ރާއްޖެއިން ސޮއިކޮށްފައިވަނީ މިދިޔަ ހޯމަ ދުވަހުއެވެ. ސަމޯއާ އެގްރީމަންޓަކީ ކުރިއަށް އޮތް 20 އަހަރަށް އީޔޫ – އޯއޭސީޕީއެސް ގުޅުމުގެ މައިގަނޑު ހަ ދާއިރާއަކަށް ބިނާވެފައިވާ ޤާނޫނީ އޮނިގަނޑު ހާމަކޮށްދޭ އެގްރީމަންޓެކެވެ. މި މައިގަނޑު ހަ ދާއިރާއަކީ ހިއުމަން ރައިޓްސް އެންޑް ޑިމޮކްރަސީ، ޕީސް އެންޑް ސެކިއުރިޓީ، ޑިވެލޮޕްމަންޓް، އިކޮނޮމިކް ގްރޯތް، ކްލައިމެޓް ޗޭންޖް އަދި މައިގްރޭޝަން އެންޑް މޮބިލިޓީއެވެ. މި އެއްބަސްވުމާ ގުޅިގެން ވަރަށް ގިނަ ބައެއްގެ ފާޑުކިޔުންތައް ވަނީ ސަރުކާރަށް އަމާޒުވެފައެވެ.
ފާޑުކިޔުންތަކަށް ރައްދު ދެއްވަމުން ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވީ ‘ސަމޯއާ އެގްރީމެންޓް’ގައި ރާއްޖެއިން ސޮއި ކުރީ އިސްލާމްދީނާއި ޤާނޫނުއަސާސީއާ އެއްގޮތްވާ ގޮތުގެ މަތިންކަމަށެވެ. އަދި ސަމޯއާ އެގްރިމަންޓުގައި ސޮއިކޮށްފައިވަނީ އިސްލާމް ދީނާއި ޤާނޫނުއަސާސީއާއި ހިލާފުވާ 12 މާއްދާއަކަށް އަމަލުނުކުރަން ރިޒަވޭޝަން ހުށަހެޅުމަށްފަހުކަމަށް ވެސް ހީނާ ވިދާޅުވިއެވެ.
މި އެގްރީމަންޓުގައި ބައިވެރިވެ އޯއޭސީޕީއެސްގެ ފުރިހަމަ މެންބަރަކަށްވުމުން ޔޫރަޕްގެ އިއްތިހާދުން އެކި ދާއިރާތަކުން ފަހިކޮށްދޭ ފުރުސަތުތައް ރާއްޖެއަށް ލިބުމުގައި ފަސޭހަ އިންތިޒާމުތަކެއް ހަމަޖެހިގެންދާނެއެވެ.
މި އެއްބަސްވުމާ ގުޅިގެން ރާއްޖެއިން ބޭރަށް އެކްސްޕޯޓް ކުރާ ކަނޑުމަހުގެ އެކި ބާވަތްތަކަށް ރަނގަޅު އަގެއް ހޯދުމަށް އިތުރު ދޮރުތަކެއް ހުޅުވުމަށް މަގުފަހިވުމަކީ އެކަށީގެންވާކަމެއްގެ ގޮތުގައި ސަރުކާރުން ވަނީ ސިފަކޮށްފައެވެ.
