ދޭވާނީއެއް ނެތުމުގެ ސަބަބުން ކްރިމިނަލް ކޯޓުގައި ހައްދު ޖެހުން މި ވަގުތު ނެތް ނަމަވެސް، ކަރެކްޝަންގެ ބެލުމުގެ ދަށުން ހައްދުޖެހުމުގެ ކަންކަން މެދު ނުކެނޑި ކުރިއަށްދާ ކަމަށް ކްރިމިނަލް ކޯޓުން ބުނެފިއެވެ.
އެގޮތުން އެ ކޯޓުން ބުނެފައިވަނީ އެ ކޯޓުގެ ދޭވާނީގެ މަޤާމް އަދާކުރަމުން ދިޔަ ފަރާތުން އެ މަގާމުން އިސްތިއުފާ ދިނުމާއި ގުޅިގެން ދެވާނީއެއް ހޯދުމަށް އިއުލާނު ކޮށްފައިވާކަމަށެވެ.
އަދި އޭނާ އިސްތިއުފާދިންތާ މަހެއް ވެސް ނުވާ ކަމަށާއި އަލަށް އެ މަގާމަށް މީހަކު އައްޔަނުކުރުމާ ދޭތެރޭ ވަގުތު ވެސް ނަގާނެކަން އެ ކޯޓުން ފާހަގަ ކުރިއެވެ.
އެހެންނަމަވެސް މިހާރުވެސް ހައްދުޖެހުމުގެ ކަންކަން މެދު ނުކެނޑި ކުރިއަށް ދާކަމަށް އެ ކޯޓުން ވަނީ ބުނެފައެވެ.
ރައްޔިތުންގެ މަޖިލިހުގެ ކޮމެޓީގައި އިއްޔެ ވާހަކަ ދައްކަވަމުން ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް ވަނީ، ދޭވާނީއެއް ނެތުމުގެ ސަބަބުން ހައްދުނުޖަހާތާ ވެސް ދުވަސްކޮޅެއްވެފައިވާ ކަމަށްވިދާޅުވެފައެވެ.
ކްރިމިނަލް ކޯޓަށް ދޭވާނީއެއް ހޯދަން އިއުލާނުކޮށްފައިވަނީ މުސާރައާއި އިނާޔަތުގެ ގޮތުގައި 8،000 ރުފިޔާއަށެވެ.
