ފަލަސްތީނުގެ ރައްޔިތުންނަށް އެހީވުމަށްޓަކައި ޤައުމީ ފެންވަރުގައި ކުރިއަށްގެންދިޔަ ‘ފަލަސްތީނާއެކު ދިވެހީން’ ޓެލެތޯނަށް ލިބުނު 19 މިލިއަނަށް ވުރެ ގިނަ ރުފިޔާ ޕީއެސްއެމްގެ ފަރާތުން ފަލަސްތީނުގެ ރައްޔިތުންނަށް ފޯރުކޮށްދިނުމަށްޓަކާ ޚާރިޖީ ވުޒާރާއާ ހަވާލުކޮށްފިއެވެ.
މި ޓެލެތޯނަށް ލިބުނު ފައިސާ ހަވާލުކުރުމަށް ބޭއްވުނު ނޫސްވެރިންގެ ބައްދަލުވުމުގައި ޕީއެސްއެމްގެ މެނޭޖިންގް ޑިރެކްޓަރ ޒީނާ ޒާހިރު ވަނީ ޓެލެތޯނުން ލިބުނު 19 މިލިއަނަށް ވުރެ ގިނަ ރުފިޔާގެ ޗެކު ޙާރިޖީ ވަޒީރު މޫސާ ޒަމީރާ ހަވާލުކުރައްވާފައެވެ.
އެ ބައްދަލުވުމުގައި ޒީނާ ވިދާޅުވި ގޮތުގައި ޓެލެތޯނުން ލިބުނު ފައިސާ ގުނުމުގެ މަސައްކަތުގައި ޓެލެތޯންގެ އިންޑިޕެންޑެންޓް އެޑިޓަރު ސީއެސްއާރު ކްރޯ މޯލްޑިވްސް، ބީއެމްއެލް އަދި ޕީއެސްއެމްގެ މުވައްޒަފުން ބައިވެރިވިއެވެ. އަދި މުޅި ޖުމުލަ 19,186,851.50 (ނަވާރަ މިލިއަން އެއްލައްކަ އަށްޑިހަ ހަ ހާސް އަށް ސަތޭކަ ފަންސާސް އެއް ރުފިޔާ ފަންސާސް ލާރި) ލިބިފައިވާކަމަށް ޒީނާ ވިދާޅުވިއެވެ.
މީގެ އިތުރުން ވެސް މި ޓެލެތޯން ކާމިޔާބުކަމާއެކީ ކުރިއަށް ގެންދެވުނީ ވަރަށް ގިނަބައެއްގެ އެހީތެރިކަމާއެކުގައިކަމަށް ޒީނާ ވިދާޅުވިއެވެ. އެގޮތުން މީޑިއާތަކާއި ސަރުކާރާއި ދަޢުލަތުގެ އެކި އިދާރާތަކުގެ އެއްބާރުލުން ލިބުނުކަން ފާހަގަކުރައްވާ އެ ފަރާތްތަކަށް ޒީނާ ޝުކުރު އަދާކުރެއްވިއެވެ. ޒީނާ ވިދާޅުވީ ޓެލެތޯނަށް ލިބުނު ފައިސާ ގުނުމުގައި ގިނަ ވަގުތު ހޭދަވިކަމަށާއި ޚާއްޞަކޮށް ވަކި ލާރީގެ ގޮތުގައި ލިބުނު 40،000 ރުފިޔާ ގުނުމަށް 6 ގަޑިއިރު ހޭދަވިކަމަށެވެ.
ފަލަސްތީނުގެ ރައްޔިތުންނަށް އެހީވުމަށް މިދިޔަ މަހުގެ 12 ވަނަ ދުވަހު ކުރިއަށްގެންދިޔަ ‘ފަލަސްޠީނާއެކު ދިވެހީން’ ޓެލެތޯނަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމަށް ޕީއެސްއެމުން ކުރިއަށްގެންދިޔަ ޓެލެތޯނެކެވެ. މި ޓެލެތޯން ކުރިއަށްދިޔަ ގޮތް ބެލެހެއްޓީ މިނިވަން އޮޑިޓް ފާމެއް ކަމަށްވާ ކްރޯ މޯލްޑިވްސްއިންނެވެ. އެ ފާމުން ފާހަގަކުރި ގޮތުގައި މި ޓެލެތޯންގެ ހުރިހާ ކަމެއް ކުރިއަށް ގެންގޮސްފައިވަނީ ޓްރާންސްޕޭރެންޓްކޮށެވެ.
މި ޓެލެތޯނުން ލިބުނު ފައިސާ ފަލަސްތީނުގެ ރައްޔިތުންނަށް ފޯރުވައިދިނުމަށް ހަމަޖެހިފައިވަނީ ޔުނައިޓެޑް ނޭޝަންސް ރިލީފް އެންޑް ވޯރކްސް އެޖެންސީ ފޮރ ޕަލެސްޓައިން ރެފިއުޖީސް (އަންރުވާ) މެދުވެރިކޮށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ.
ޓެލެތޯނަށް ލިބުނު ފައިސާގެ ތެރޭގައި 49,800 ޑޮލަރު ހިމެނެއެވެ. އޭގެ އިތުރުން 15،495،613.31 ރުފިޔާއަކީ އޮންލައިން ޓްރާންސެކްޝަންގެ ގޮތުގައި ލިބިފައިވާ ފައިސާއެވެ. އަދި އޮންލައިން ޓްރާންސެކްޝަންގެ ގޮތުގައި 37919 ޑޮލަރުވެސް ލިބިފައިވެއެވެ. މީގެ އިތުރުން އެކި ސަރަހައްދުތަކުގައި ބެހެއްޓި ފަންޑު ފޮށިތަކަށް 1،417،549.93 ރުފިޔާ ލިބިފައިވާއިރު 11،768 ޑޮލަރު ވެސް ފަންޑުފޮށިތަކަށް ލިބިފައިވެއެވެ. މީގެ އިތުރުން ޕީއެސްއެމުން ކުރިއަށް ގެންދިޔަ ލައިވް ކަވަރޭޖްގެ ތެރޭގައި ވެސް 1،505،759 މިލިޔަން ރުފިޔާއާއި 113 ޑޮލަރު ލިބިފައިވެއެވެ.
