ރައްޔިތުންގެ މަޖިލިހުގައި ތިއްބަވާ އިދިކޮޅު މެމްބަރުންނަށް ފިއްތުންތައް ކުރިމަތުކުރަމުން އަންނަކަމުގެ ކަންބޮޑުވުން އެމްޑީޕީން ފާޅުކޮށްފިއެވެ.
އެމްޑީޕީގެ ޕީޖީ ގްރޫޕުން އިއްޔެ ބޭއްވި ނޫސްވެރިންގެ ބައްދަލުވުމެއްގައި ކެންދޫ ދާއިރާގެ މެމްބަރު މައުރޫފު ޒާކިރު ވަނީ، އިދިކޮޅު މެމްބަރުން ޖަލަށް ލާނެކަމަށް ބުރެ ސަރުކާރުގެ މެމްބަރުން ބިރުދައްކަމުން އަންނަކަން ފާހަގަކުރައްވައި ކަންބޮޑުވުން ފާޅުކުރައްވައިފައެވެ.
އެގޮތުން ސަރުކާރުގެ މެމްބަރުން ބިލުތަކަށް ބަހުސް ކުރައްވަމުން ގެންދަވާއިރުވެސް އިދިކޮޅު ފަރާތްތަކަށް އޮތް ޖާގަ ހަނިވެ އަދި ހާއްސަކޮށް އިދިކޮޅު ފަރާތްތައް ހައްޔަރު ކުރެވި ނުވަތަ ބިރު ދެއްކުމުގެ އިޝާރާތް ކުރައްވައިފައިވާކަން މައުރޫފް ޗަނީ ފާހަގަ ކުރައްވައިފައެވެ.
އެގޮތުން ރައްޔިތުންގެ މަޖިލިސް ހިންގަމުން އަންނަނީ ސީދާ ރައީސުލްޖުމްހޫރިއްޔާ ބޭނުންފުޅުވެ ލައްވާގޮތަށްކަން ފާހަގަކުރައްވައި މައުރޫފް ވަނީ، ރައީސަށް ސަނާ ކިޔުމާއި، ރައީސް އޮފީހުން ފޮނުވާ ޕޮއިންޓް ތަކަށް މެމްބަރުން ވާހަކަ ދައްކަވާ ކަމަށް ތުހުމަތު ކުރައްވައިފައެވެ.
އެގޮތުން ރާއްޖޭގެ އިގްތިސާދު އޮތީ ވަރަށް ދަށުގައި ކަމަށް ސަރުކާރުން ވިދާޅުވި ނަމަވެސް އެ ކަމަށް އެކަށޭނަ ފިޔަވަޅުތަކެއް އަޅަމުން އަންނަ ތަނެއް ނުފެންނަ ކަމަށްވެސް އިއްޔެގެ ބައްދަލުވުމުގައި ވަނީ ފާހަގަކުރައްވައިފައެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ގަލޮޅު ދެކުނު ދާއިރާގެ މެމަބަރު މީކާއިލް އަހުމަދު ނަސީމް ވިދާޅުވީ، މިއަދު ރާއްޖޭގެ އިގްތިސާދު ހާލަތު އޮތް ހިސާބުން އެކަމަށް ފިޔަވަޅު އެޅުމާއި ދޭތެރޭ އެމްޑީޕީން ދެކޮޅު ނޫން ކަމަށެވެ.
އިދިކޮޅު ފަރާތްތައް ބިރު ދައްކައި ހައްޔަރު ކުރަން އުޅޭ ކަމަށް އެމްޑީޕީން ތުހުމަތުކުރި ނަމަވެސް، ރައީސް ޑރ. މުހައްމަދު މުއިއްޒު ވަނީ، އެމަނިކުފާނުގެ ވެރިކަމުގައި ސިޔާސީ ގޮތުން ބަދަލުހިފުމެއް ނޯންނާނެ ކަމުގެ ޔަގީންކަން ދެއްވައިފައެވެ.
