މާލޭގެ ގެއެއްގައި މިއަދު ހިނގައި ދިޔަ ނުރައްކާތެރި އަލިފާނުގެ ހާދިސާގައި އަނިޔާވި ދެ މީހުންގެ ތެރެއިން އެކަކަށް ވެންޓިލޭޓަރުގައި ފަރުވާ ދޭން ފަށައިފިއެވެ.
މާފަންނު ފުލޫނިއާ މަގުގައި ހުރި މ.އެންޒިއަންގޭގެގައި ހިނގައިދިޔަ އަލިފާނުގެ ހާދިސާގައި ދެ މީހަކަށް އަނިޔާވެފައިވާއިރު، ރޯވެފައި ވަނީ އެ ގޭގެ ތިން ވަނަ ފަންގިފިލާގައެވެ.
ފުލުހުން މައުލޫމާތު ދީފައިވާ ގޮތުގައި މިހާދިސާގައި އަނިޔާވި ދެ މީހަކަށް ފަރުވާ ދިނުމަށް ވަނީ އައިޖީއެމްއެޗަށް ގެންގޮސްފައެވެ.
އަނިޔާވި ދެމީހުންގެ ތެރެއިން އެކަކަށް މިހާރު ފަރުވާ ދެމުން ދަނީ ވެންޓިލޭޓަރުގައި ބާއްވައިގެން ކަމަށް އަނިޔާވި މީހާގެ އާއިލާ އާއި ހަވާލާދީ ވަގުތު ނޫހުން ރިޕޯޓްކޮށްފައިވެއެވެ. އެގޮތުން ވެންޓިލޭޓަރުގައި އޮތީ 28 އަހަރުގެ ފިރިހެނެކެވެ.
މިހާދިސާ އާއި ބެހޭ ގޮތުން އެމްއެންޑީއެފް އިން ވިދާޅުވީ އެ ގޭގެ ތިން ވަނަ ފަންގިފިލާގައި އަލިފާނުގެ ހާދިސާއެއް ހިނގައިގެން އެމްއެންޑީއެފް ފަޔާ އެންޑް ރެސްކިއު ސާވިސް އިން ހަރަކާތްތެރިވަމުންދާ ކަމަށާއި މިހާރު އަލިފާންގަނޑު ނިއްވާލާފައިވާ އިރު، ދުމުގެ އަސަރުކޮށްގެން ހަތަރު މީހަކު ހޮސްޕިޓަލަށް ގެންގޮސްފައިވާ ކަމަށެވެ.
