އެސިސްޓެންޓު ކޮމިޝަނަރ އޮފް ޕޮލިސް މުޙައްމަދު ރިޔާޒް ހިތުގެ ދެ ނާރެއް ބެދުމުގެ ސަބަބުން ހާލު ދެރަވެ، ދަރުމަވަންތަ ހޮސްޕިޓަލުގައި ފަރުވާ ދޭން ފަށައިފިއެވެ.
ސިއްހީ މައްސަލަތަކެއް ހުރުމުން އޭނާއަށް ޓްރީޓޮޕްގައި ފަރުވާދޭން ފެށީ މިދިޔަ ހޯމަ ދުވަހުއެވެ. ނަމަވެސް ފަހުން ވަނީ ދަރުމަވަންތަ ހޮސްޕިޓަލަށް ބަދަލުކޮށްފައެވެ.
ރިޔާޒް މަތީ ތަޢުލީމު ހާސިލު ކުރެއްވީ ކެނެޑާއިންނެވެ. އަދި ފުލުހުންގެ ޚިދުމަތަށް އަގުހުރި އެތައް ޚިދުމަތެއް ކޮށްދިނުމަށް ފަހު ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ރިޔާޒަށް ކުރެވުނު ތުހުމަތުތަކަކާ ގުޅިގެން ސެޕްޓެމްބަރު 2017 ގައި ކޯޓުން ނިންމި ނިންމުމާ ގުޅިގެން އެ މަގާމުން ދުރުވާން ޖެހުނެވެ. ނަމަވެސް ޑިސެމްބަރު 2018 ގައި ކޯޓުން ވަނީ އަލުން އޭނާއަށް ވަޒީފާދޭން ހުކުމްކޮށްފައެވެ.
އެއަށް ފަހު ރައީސް ޞާލިހުގެ ވެރިކަމުގައި ރިޔާޒް އެސިސްޓެންޓު ކޮމިޝަނަރ އޮފް ޕޮލިސް (އޭސީޕީ)ގެ މަގާމަށް އައްޔަންކުރެވިގެންދިޔައެވެ. އެއީ 2019 ވަނަ އަހަރުގެ މާރިޗު މަހުގެ ތެރޭގައެވެ. އޭގެ އިތުރުން ރިޔާޒު ވަނީ މިދިޔަ އަހަރުގެ ނޮވެމްބަރު މަހާ ހަމައަށް ފުލުހުންގެ ކްރިމިނަލް އިންވެސްޓިގޭޝަންގެ އިސްވެރިޔާގެ މަގާމު ވެސް ފުރުއްވާފައެވެ.
