މިއަހަރުގެ ޖޫން މަހާއި ހަމައަށް އައިއިރު މިދިޔަ އަހަރުގެ އެ މުއްދަތުގައި މަސް އެކްސްޕޯޓް ކުރި މިންވަރާއި އަޅައި ބަލާއިރު ބޮޑުތަނުން ދަށަށް ގޮއްސިއެވެ.
މޯލްޑިވެސް މަނިޓަރީ އޮތޯރިޓީ (އެމްއެމްއޭ) ގެ ތަފާސް ހިސާބުތައް ދައްކާގޮތުން މިދިޔަ އަހަރުގެ ޖޫން މަހާއިހަމަ އަށް މި އަހަރުގެ އެ މުއްދަތު އަޅައި ބަލާއިރު، 47 އިންސައްތަ ވަނީ ދަށަށް ގޮއްސައެވެ.
އެގޮތުން މިދިޔަ އަހަރުގެ މި މުއްދަތުގައި 44،730 މެޓްރިކް ޓަނުގެ މަސް ރާއްޖެއިން އެކްސްޕޯޓުކޮށްފައިވާއިރު، މި އަހަރު އެ މުއްދަތުގައި އެކްސްޕޯޓްކޮށްފައިވަނީ 23،464.8 މެޓްރިކް ޓަނުގެ މަހެވެ.
މިއީ މިދިޔަ އަހަރުގެ އެ މުއްދަތާއި އަޅާބަލާއިރު 21،266 މެޓްރިކް ޓަނު ދަށް އަދަދެކެވެ. އަދި 47.5 އިންސައްތައިގެ ދަށްވުމެކެވެ.
އެގޮތުން އެ ތަފާސް ހިސާބުތަކަށް ބަލާއިރު، މި މުއްދަތު ތެރޭގައި ރާއްޖެއިން އެންމެ ގިނައިން އެކްސްޕޯޓްކޮށްފައިވަނީ ކަޅުބިލަމަހެވެ. އެގޮތުން މެއި މަހުގެ ނިޔަލަށް 14,985.1 މެޓްރިކް ޓަނުގެ ކަޅުބިލަމަސް އެކްސްޕޯޓްކޮށްފައިވާއިރު މިދިޔަ އަހަރު އެ މުއްދަތުގައި އެކްސްޕޯޓްކޮށްފައިވަނީ 32,443.6 މެޓްރިކް ޓަނުގެ ކަޅުބިލަމަހެވެ.
މީގެ އިތުރުން މިއަހަރު 4،670 މެޓްރިކް ޓަނުގެ ރީނދޫ އުރަހަ ކަންނެލި އެކްސްޕޯޓްކޮށްފައިވާއިރު މަސްދަޅު އަދި ޕޯޗްޑްގެ ގޮތުގައި 3،050 މެޓްރިކް ޓަނުގެ މަސް ބޭރުކޮށްފައިވެއެވެ.
ރާއްޖެއިން މަސް އެކްސްޕޯޓްކުރާ އަދަދު ދަށަށް މިދިޔައީ، ރާއްޖޭގެ މަސްވެރިކަމުގެ ސިނާއަތަށް ފާއިތުވީ ދުވަސްތަކުގައި ލޮޅުން އަރާފައިވުމުންނެވެ.
އެގޮތުން މަސްވެރިން ކިރާ މަހަށްވާ ފައިސާ ގިނަ ދުވަސްތަކެއް ވަންދެން ނުލިބުމުގެ ސަބަބުން މަސްވެރިން މިއަހަރުތެރޭ މަސް ނުބާނައި ގިނަ އިހުތިޖާޖު ވަނީ ކޮށްފައެވެ. އެހެންކަމުން މަސްވެރިކަމުން ރާއްޖެއަށް ލިބޭ އާމްދަނީއަށް އޭގެ ނޭދެވޭ އަސަރު ވަނީކޮށްފައެވެ.
