މޯލްޑިވްސް އިމިގްރޭޝަނާއި މޯލްޑިވްސް ޕޮލިސް ގުޅިގެން ގަވާއިދާ ޚިލާފަށް ރާއްޖޭގައި އުޅޭ ބިދޭސީން ހޯދުމަށް ހިންގާ ޕްރޮގްރާމުގެ ދަށުން އިމިގްރޭޝަންގެ ބެލުމުގެ ދަށަށް ގެނެވޭ ބިދޭސީން ގަވާއިދުގެ ތެރެއަށް ވަނުމުގެ ފުރުސަތު ދޭނެކަމަށް އިމިގްރޭޝަނުން ބުނެފިއެވެ.
އިމިގްރޭޝަންގެ ފަރާތުން މި ކަން ހާމަކުރައްވާފައިވަނީ ސީނިއާ އިމިގްރޭޝަން އޮފިސަރު އިސްމާއިލް ޝަރީފް މީޑީއާއަކަށް ދިން އިޓްވިއުއެއްގައެވެ. ޝަރީފް ވިދާޅުވި ގޮތުގައި މި ޕްރޮގްރާމުގެ ދަށުން ހޯދޭ ބިދޭސީންގެ ކޮންމެ މީހަކީ އަނބުރާ ޤައުމަށް ފޮނުވާލާނެ މީހެއް ނޫނެވެ. އަދި އެ ބިދޭސީންނަށް ގަވާއިދަށް އުޅުމަށް މަގުފަހިވާނެކަމަށާއި ހޯމް މިނިސްޓްރީން ކުރިއަށް ގެންދާ ކުރަނގި އޮޕަރޭޝަނަކީ ވެސް ހަމަ އެ ފަދަ އޮޕަރޭޝަނެއްކަމަށް އޭނާ ވިދާޅުވިއެވެ.
ޝަރީފް ވިދާޅުވީ، މީގެ ކުރިން ވެސް އެ ފުރުސަތު އިމިގްރޭޝަނުން ފަހިކޮށްދީފައި ވާނެކަމަށެވެ. އަދި މިހާރު ވެސް ހޯމް މިނިސްޓްރީގެ ދަށުން އެ ފުރުސަތުތައް ބިދޭސީންނަށް ފަހިވާނެކަމަށް އޭނާ ވިދާޅުވިއެވެ.
ގަވާއިދާ ޚިލާފަށް ރާއްޖޭގައި އުޅެމުން އައި 1800އަށް ވުރެ ގިނަ ބިދޭސީން މި އަހަރުގެ ޖޫން މަހުގެ ނިޔަލަށް ހޯމް މިނިސްޓްރީން ކުރިއަށް ގެންދާ ކުރަނގި އޮޕަރޭޝަންގެ ދަށުން ފުރުވައިލައިފައިވާކަމަށް އިމިގްރޭޝަނުން ހާމަކުރެއެވެ. ހޯމް މިނިސްޓަރު އަލީ އިހުސާން މީގެ ކުރިން ވިދާޅުވީ، ގަވާއިދާ ޚިލާފަށް ރާއްޖޭގައި އުޅޭ ބިދޭސީން ދެނެގަނެ، އެ މީހުން ގަވާއިދަށް ފެއްތުމުގެ މަސައްކަތް 3 އަހަރު ތެރޭގައި އެއްކޮށް ނިންމާލެވޭނެކަމަށެވެ. އަދި، މި އޮޕަރޭޝަންގެ މައިގަނޑު މަޤްޞަދަކީ ބިދޭސީން ހައްޔަރުކޮށް ޑީޕޯޓުކުރުން ނޫންކަމަށާއި، ގަވައިދާ އެއްގޮތަށް ހުއްދަ ދެވެން ތިބި މީހުންނަށް ހުއްދަ ދިނުންކަމަށް ވެސް އިހުސާން ވިދާޅުވެފައިވެއެވެ.
