ގަވާއިދާ ހިލާފަށް ބިދޭސީން ހިންގަމުންދާ ކުދި އަދި މެދުފަންތީގެ ވިޔަފާރިތަކަށް ހާއްސަކޮށްގެން ފުލުހުން ކުރިއަށް ގެންދިޔަ ރެއިޑް އޮޕަރޭޝަނެއްގައި މާލޭގެ ދެ މާރުކޭޓެއް ބަލާ ފާސްކޮށް ހަ ބިދޭސީއަކު ރޭ ހައްޔަރުކޮށްފިއެވެ
މޯލްޑިވްސް އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބަޔާންކޮށްފައިވާ ގޮތުގައި ރޭގެ އޮޕަރޭޝަންގައި އިމިގްރޭޝަންގެ ބެލުމުގެ ދަށަށް ގެނެސްފައިވަނީ ހަތަރު ބިދޭސީ ފިރިހެނަކާއި ދެ ބިދޭސީ އަންހެނަކު ކަމަށެވެ.
މިފަހުން އިމިގްރޭޝަނުން ވަނީ ގަވާއިދާއި ޚިލާފަށް ރާއްޖޭގައި އުޅޭ ގިނަ އަދަދެއްގެ ބިދޭސީން ހައްޔަރުކޮށްފައެވެ. އެގޮތުން ފުލުހުންނާއި ގުޅިގެން ވެސް އިމިގްރޭޝަނުން ރެއިޑް އޮޕަރޭޝަންތަކެއް ކުރިއަށް ގެންގޮސްފައިވާ އިރު، އިމިގްރޭޝަނުން ހާމަކޮށްފައިވާ ގޮތުގައި ކުރިއަށް އޮތްތަނުގައި ވެސް ހުއްޓުމެއްނެތި މިފަދަ އޮޕަރޭޝަންތައް ކުރިއަށް ގެންދިއުމަށް ހަމަޖެހިފައިވާ ކަމަށެވެ.
އިމިގްރޭޝަނުން ގިނަ އިދާރާތަކަކާއި އެކު ގުޅިގެން ކުރިއަށް ގެންދާ މި ރެއިޑް އޮޕަރޭޝަންތަކުގައި ގިނަ އަދަދެއްގެ ބިދޭސީން ހައްޔަރުކޮށްފައިވާ އިރު، މި ރެއިޑްތަކުގައި ހައްޔަރު ކުރާ ބިދޭސީން ތިބީ ޑިޓެންޝަން ސެންޓަރުގައެވެ. އަދި އެ އިދާރާއިން ނިންމާފައި ވަނީ އެމީހުން ޑީޕޯޓްކޮށްލަން ކަމަށްވެސް އިމިގްރޭޝަނުން މީގެ ކުރިން ބުނެފައިވެއެވެ.
ރާއްޖޭގައި ފިހާރަތަކުގަޔާއި ގޮޅިތަކުގައި އަދި އެހެނިހެން ވެސް ވިޔާފަރިތަކުގައި ސޭޓުންނަށް ބިދޭސީން ބޭތިއްބުމަކީ މަނާކަމެކެވެ. އެހީތެރިންގެ ގޮތުގައި ބިދޭސީން މަސައްކަތް ކުރި ނަމަވެސް ތަންތަނުގެ ސޭޓުންނަށް ތިބެން ޖެހޭނީ ދިވެހިންނެވެ.
