ރާއްޖެއަށް އެމްބިއުލާންސްތަކެއް ގެނައުމުގައި ކޮރަޕްޝަނަށް މަގުފަހިވާ ގޮތަށް އަމަލުކުރި ކަމަށް ބުނެ ހެލްތު މިނިސްޓްރީގެ ކުރީގެ އިސްވެރިންގެތަކެއް މައްޗަށް ދައުލަތުން ދައުވާކޮށްފި އެވެ.
ދައުވާކުރީ ފެބްރުއަރީ 2019 ގައި ހަތަރު އެމްބިއުލާންސް ހޯދުމަށް ހެލްތް މިނިސްޓްރީން އިއުލާން ކުރުމަށް ފަހު، އިއުލާނުގައިވާ މައުލޫމާތާ ހިލާފަށް އަމިއްލަ ކުންފުންޏަކާ އެމްބިއުލާންސް ގެނައުމަށް ހަވާލު ކޮށްފައިވާތީ އަދި ޑީސަލް އަޅައިގެން ދުއްވާ ހަތަރު އެމްބިއުލާންސެއް ހޯދަން އިއުލާން ކުރުމަށް ފަހު، އަމިއްލަ ކުންފުންޏަކަށް އެ މަސައްކަތް ހަވާލު ކުރިއިރު، ޕެޓްރޯލް އަޅާ ބާވަތުގެ އެމްބިއުލާންސް ގެނައުމަށް ހަވާލު ކޮށްފައިވާތީ ހެލްތު މިނިސްޓްރީގެ ކުރީގެ އިސްވެރިންގެތަކެއް މައްޗަށް ދައުލަތުން ވަނީ ދައުވާކޮށްފައެވެ.
މިމައްސަލާގައި ދައުލަތުން ވަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ ހެލްތު މިނިސްޓްރީގެ ކުރީގެ ޑެޕިއުޓީ މިނިސްޓަރު ނިޝާމާ މުހައްމަދާއި އެ މިނިސްޓްރީގެ ބިޑް ކޮމެޓީގެ އޭރުގެ މެމްބަރު އަހުމަދު ނާސިރުގެ އިތުރުން އެ މިނިސްޓްރީގެ ކުރީގެ ޑިރެކްޓަރު އަހުމަދު އަސްލަމާއި ޝިނާ އަހުމަދުގެ މައްޗަށް ކޮށްފައެވެ.
މިދިޔަ މާޗް މަހު ދައުލަތުން އެ މައްސަލަ ކޯޓަށް ފޮނުވާފައިވާއިރު، 2020 ވަނަ އަހަރު ކޮވިޑް-19 އާ ގުޅިގެން ވެންޓިލޭޓަރު ގެނައުމުގެ މަސައްކަތް ހަވާލުކުރި މައްސަލާގައި ވެސް ހެލްތް މިނިސްޓްރީގެ ބިޑް ކޮމެޓީގެ އޭރުގެ މެމްބަރުންތަކަކާއި އޭރުގެ ހެލްތު މިނިސްޓަރު އަބްދުالله އަމީންގެ މައްޗަށް ދައުވާކުރަން އެންޓި ކޮރަޕްޝަން ކޮމިޝަން (އޭސީސީ) އިން އެދިފައިވާއިރު، އޭރުގެ ޕްރޮސެކިއުޓާ ޖެނެރަލްގެ އޮފީހުން ނިންމާފައި ވަނީ ދައުވާ ކުރެވޭނެ ހެއްކެއް ނެތް ކަމަށެވެ.
