އެމްޑީޕީގެ ނައިބު ރައީސަކަށް ހިސާން ހުސައިން އައްޔަން ކުރަން ހުށަހަޅުއްވައިފިއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި އެމްޑީޕީގެ ރައީސް އަބްދުﷲ ޝާހިދު ވަނީ އެމްޑީޕީގެ ނައިބު ރައީސްގެ މަގާމަށް އެޕާޓީގެ ލީގަލް ޑިރެކްޓަރު އައްޔަން ކުރެއްވުމަށް ގަސްތުކުރައްވައި ޤައުމީ މަޖިލީހުގެ ރުހުން އޮތްތޯ ބެލުމަށް އަސާސީ ގަވާއިދުގައިވާގޮތުގެމަތިން ހުށަހަޅުއްވާފައިވާކަމަށް ބުނެފައެވެ.
އެމްޑީޕީގެ ގަވާއިދުގައި ކަނޑައަޅުއްވާފައިވާ ގޮތުގައި އެޕާޓީގެ ނައިބު ރައީސް އައްޔަންކުރާނީ ޕާޓީގެ ރައީސްގެ ލަފާގެ މަތިން ޤައުމީ މަޖިލީހުންނެވެ.
ހިސާން އަކީ އެމްޑީޕީއަށާއި އެޕާޓީގެ މެންބަރުންނަށް އިޚްލާސްތެރި ޚިދުމަތްތަކެއް ކުރައްވާފައިވާ ބޭކަނބަލެއް ކަމަށާއި އެމްޑީޕީގެ ނައިބު ރައީސްގެ މަގާމަށް އެންމެ އެކަށީގެންވާ ބޭފުޅަކީ ހިސާން ކަމަށް ދެކެވަޑައިގަންނަވާ ކަމަށެވެ.
ޝާހިދް އިތުރުން ވިދާޅުވީ އެމްޑީޕީގެ ލީޑަރޝިޕްގައި މިވަގުތު އަންހެނުން މަދުވުމަކީވެސް ނައިބު ރައީސަކަށް ހިސާން އައްޔަން ކުރުމަށް ނިންމެވި ސަބަބެއް ކަމަށެވެ.
