ހުޅުމާލޭ 2 ވަނަ ފިޔަވަހީގައި ހަޓުތައް ހިންގި ސަރަހައްދުގައި ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ ފަރާތުން ކިއޮސްކުތަކެއް ހެދުމުގެ މަސައްކަތް ފަށައިފިއެވެ.
މީގެ ކުރިން އެ ސަރަހައްދުގައި ހަޓު ހަދައި، ވިޔަފާރި ކުރަމުން ދިޔައީ ގަވާއިދާ ހިލާފަށެވެ. އެހެންކަމުން އެޗްޑީސީން ވަނީ އެކަން ހުއްޓުވައިފައެވެ. އެޗްޑީސީގެ އޮފިޝަލަކު އިއްޔެ މީޑިއާތަކަށް ވިދާޅުވީ އެ ސަރަހައްދުގައި މިހާރު ހަދަމުން އަންނަނީ ކިއޮސްކުތަކެއް ކަމަށެވެ. ނަމަވެސް އެ ތަންތަން އާންމުންނަށް ދޫކުރާނީ ކޮން އުސޫލަކުންކަމެއް އެޗްޑީސީން އަދި ހާމައެއް ނުކުރެއެވެ.
އެޗްޑީސީން މީގެ ކުރިން ބުނެފައިވާ ގޮތުގައި ބީޗާއި ރުއްގަނޑުގައި ހަދާފައި ހުރި ހަޓުތައް ނެގީ މުއްދެއް ދިނުމުން ވެސް ތަން ހުސް ނުކުރުމުންނެވެ. އެ ސަރަހައްދު ހުސްކުރަން އެންގީ، އެކަށީގެންވާ ގޮތެއްގައި ތަރައްގީ ކުރަންކަމަށް ވެސް އެޗްޑީސީން ވަނީ ބުނެފައެވެ.
ބީޗު ސަރަހައްދުގައި ހުރި ހަޓުތައް އެޗްޑީސީން ނެގިކަމުގައިވިއަސް، ހިޔާ ފްލެޓް ސަރަހައްދުގައި އަދިވެސް ބައެއް މީހުން ހަޓު ހަދައިގެން ވިޔަފާރިކުރަމުން އަންނަކަން ފާހަގަކޮށްލެވެއެވެ.
