ދިވެހިރާއްޖޭގެ އިސްލާމީ ޔުނިވަރސިޓީގެ އައު އިމާރާތެއް އެޅުމަށް އެ ޔުނިވަރސިޓީއަށް ހުޅުމާލެއިން 35000 އަކަފޫޓުގެ ބިމެއް ހަމަޖައްސައިފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
މިކަން ހާމަކޮށް އެމަނިކުފާނު އެކްސްގައި ކުރެއްވި ޕޯސްޓެއްގައި ވިދާޅުވީ، އައިޔޫއެމް ހިންގުމަށް އެކަށީގެންވާ އާ އިމާރާތެއް އެޅުމަށް ސަރުކާރުން ގެންގުޅޭ އަމާޒުގެ ދަށުން އައިޔޫއެމްއަށް އައު އިމާރާތެއް އެޅުމަށް ހުޅުމާލެއިން ބިމެއް ހަމަޖައްސައިފައިވާކަމަށެވެ.
މީގެ އިތުރުން ރާއްޖޭން ބޭރުގެ ދަރިވަރުން ވެސް މަތީ ތައުލީމު ހާސިލްކުރުމަށް އައިޔޫއެމްއަށް ގެނައުމަކީ އެ ޔުނިވާސިޓީގެ އަމާޒެއް ކަމުގައި ފާހަގަ ކުރައްވައި ވަޒީރު ވަނީ ވިދާޅުވެފައިވަނީ، އައިޔޫއެމްއަކީ މުހިއްމު މުއައްސަސާއެއް ކަމަށާއި އައިޔޫއެމްގެ ކުރިއެރުމަށް އެ ވުޒާރާއިން ދޭން ޖެހޭ އެންމެ ފުރިހަމަ އެއްބާރުލުން އަބަދުވެސް ދެއްވާނެކަމުގެ ޔަގީންކަން ދެއްވާފައެވެ.
ދިވެހިރާއްޖޭގައި އަރަބި އިސްލާމް ތަޢުލީމު ފޯރުކޮށްދޭ އެންމެ ބޮޑު މުއައްސަސާ، އިސްލާމީ ޔުނިވަރސިޓީއަށް މި އަހަރު 45 އަހަރު ވަނީ ފުރިފައެވެ.
