އދގެ އިންޓަނޭޝަނަލް ކޮވެނެންޓް އޮން ސިވިލް އެންޑް ޕޮލިޓިކަލް ރައިޓްސް (އައިސީސީޕީއާރު)ގެ ދަށުން ރާއްޖޭގައި ޙައްޤުތައް ދެވޭނީ އިސްލާމް ދީނާ އެއްގޮތްވާ ގޮތުގެ މަތިންކަމަށް ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.
ބަންޑާރަ ނައިބް މިހެން ވިދާޅުވީ އައި.ސީ.ސީ.ޕީ.އާރުގެ ޤައުމީ ރިވިއުގައި ރާއްޖޭގެ ވަފުދުގެ އިސްވެރިއެއްގެ ގޮތުގައި ބައިވެރިވެވަޑައިގެން ވާހަކަފުޅު ދައްކަވަމުންނެވެ.
މަދަނީ އަދި ސިޔާސީ ޙައްޤުތަކާއި މިނިވަންކަން ލިބިދިނުމަށް އެކުލަވައިލައިފައިވާ މުއާހަދާއެއްކަމަށްވާ އައިސީސީޕީއާރަށް ރާއްޖެއިން އަމަލުކުރާ މިންވަރާ ގުޅޭ ރިޕޯޓެއް، ރާއްޖެއިން އދ.ގެ ހިއުމަން ރައިޓްސް ކޮމިޓީއަށް ވަނީ ހުށަހަޅައިފައެވެ. އެއީ މި ހަފްތާގެ އަންގާރަ ދުވަހާއި އިއްޔެއާ ހިމެނޭހެން 2 ދުވަހުގެ މަތިންނެވެ. މި ރިޕޯޓު ރިވިއު ކުރުމަށްޓަކައި އދ. ގެ އިންސާނީ ޙައްޤުތަކާ ބެހޭ ކޮމެޓީން ސްވިޓްޒަލޭންޑްގެ ޖެނީވާގައި ބަޔާންވެ ދިޔަ 2 ދުވަހު ކުރިއަށް ގެންދިޔަ ރިވިއުގައި ރާއްޖޭގެ ފަރާތުން މަތީ ފަންތީގެ ވަފުދެއް ވަނީ ބައިވެރިވެވަޑައިގެންފައެވެ.
މި ރިވިއު ފެށުމުގެ ގޮތުން ރާއްޖޭގެ ވަފުދުގެ އިސްވެރިއާގެ ހައިސިއްޔަތުން ވާހަކަފުޅު ދައްކަވަމުން ބަންޑާރަ ނައިބު އަލްއުސްތާޛް އަޙްމަދު އުޝާމް ވިދާޅުވީ، އިސްލާމް ދީނަކީ، ދިވެހި ރައްޔިތުކަމުގެ މައިގަނޑު އެއް އަސާސްކަމަށެވެ. އަދި އެއީ ދިވެހި މުޖްތަމަޢުގައި ބަދަލުކުރުމުގެ ފުރުސަތު ނުދެވޭނެ އަސްލެއްކަމަށް އުޝާމް ވިދާޅުވިއެވެ.
މީގެ އިތުރުން ދިވެހިރާއްޖޭގެ ހިންގުމުގެ ނިޒާމާއި، ޤާނޫނީ އޮނިގަނޑު ހަރުދަނާ ކުރުމަށް ސަރުކާރުން ކުރަމުންދާ މަސައްކަތްތަކަށް ބަނޑާރަ ނައިބު އަލިއަޅުވާލެއްވިއެވެ. ރާއްޖޭގައި އައިސީސީޕީއާރުގެ ޙައްޤުތައް ލިބިދެވޭނީ، ގާނޫނުއަސާސީއާއި، ގާނޫނުތަކާއި، އިސްލާމްދީނުގެ އަސްލުތަކާ އެއްގޮތްވާ ގޮތުގެ މަތިންކަމަށް އުޝާމް ވިދާޅުވިކަމަށް ވެސް، ބަންޑާރަ ނައިބުގެ އޮފީހުގެ ބަޔާނުގައިވެއެވެ.
އެ ކޮމިޓީ ބައްދަލުވުމުގައި ބަންޑާރަ ނައިބުގެ އޮފީހުގެ އިތުރުން ރައީސް އޮފީހާއި ޚާރިޖީ، ދާހިލީ އަދި އާއިލީ ތަރައްޤީއާ ބެހޭ މިނިސްޓްރީން ވެސް ބައިވެރިވިކަން ފާހަގަކޮށްލެވެއެވެ. އެ ޑެލިގޭޝަންގައި އިސްކޮށް ހުންނެވީ އުޝާމެވެ.
