ރާއްޖޭގައި މަރުގެ އަދަބު އުވާލުމަކީ އިސްލާމީ ޝަރީއަތާއި ޤާނޫނު އަސާސީއާ ޚިލާފު ކަމަކަށް ވާތީ، ރާއްޖޭގައި މަރުގެ އަދަބު ދިނުން އުވާލެވެން ނޯންނާނެކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިހްސާން ވިދާޅުވެއްޖެއެވެ.
އިހްސާން މިހެން ވިދާޅުވީ އދ. ގެ ހިއުމަން ރައިޓްސް ކައުންސިލްގައި އިންސާނީ ޙައްޤުތަކާ ބެހޭ ޔުނިވާސަލް ޕީރިއަޑިކް ރިވިއު ހާމަކުރުމަށް ބޭއްވި ބައްދަލުވުމުގައެވެ. މި ބައްދަލުވުން ކުރިއަށް ދިޔައީ ސްވިޓްޒަލޭންޑްގެ ޖެނީވާގައެވެ.
އެ ބައްދަލުވުމުގައި ވާހަކަފުޅު ދައްކަވަމުން އިހްސާން ވިދާޅުވީ ރާއްޖޭގައި މަރުގެ ހުކުމް އިއްވަނީ ޤާނޫނުތަކުގެ ދަށުންކަމަށެވެ. އަދި ރާއްޖޭގެ ޤާނޫނު އަސާސީގެ މައިގަނޑު މަސްދަރަކީ އިސްލާމީ ޝަރީއަތްކަމަށްވާތީ، ރާއްޖޭގައި މަރުގެ އަދަބު އުވާލުމަކީ ކުރެވޭނެ ކަމެއް ނޫންކަމަށް އިހްސާން ވިދާޅުވިއެވެ.
އިހްސާން ފާހަގަކުރެއްވި ގޮތުގައި ރާއްޖޭގެ ޤާނޫނުތަކުގައިވާ ގޮތުން މީހަކަށް މަރުގެ ހުކުމް އިއްވޭނީ ވަރަށް މަދު ހާލަތްތަކެއްގައެވެ. އެގޮތުން މަރުގެ ހުކުމް އިއްވުމުގައި އެއްވެސް ޝައްކެތް ނެތް މިންވަރަށް އެ ކުށް ސާބިތުވުން، ޤާނޫނު ލާޒިމުކުރާކަމަށް ވެސް އެ ބޭފުޅާ ވިދާޅުވިއެވެ. މި ޤާނޫނުތައް ހެދިފައި މި ވަނީ ދިވެހި ރައްޔިތުން ބޭނުންވާ ގޮތަށްކަމަށް އިހްސާން ވިދާޅުވިއެވެ. އަދި ހުކުމް ތަންފީޒު ކުރާނީ ވެސް ސުޕްރީމް ކޯޓާ ހިސާބުން އިސްތިއުނާފްގެ ހުރިހާ މަރުހަލާތައް ނިމުމުންކަމަށް އިހްސާން ވިދާޅުވިއެވެ.
މިހާރު ކުރިއަށްދާ ކޭސްތަކަށް އަލިއަޅޫވާލައްވާ އިހްސާން ވިދާޅުވީ މަރުގެ ހުކުމް އިއްވާފައިވާ 16 މީހަކު މިހާރު ރާއްޖޭގައި އެބަ ތިބިކަމަށެވެ. އަދި އޭގެ ތެރެއިން 4 މީހެއްގެ އިސްތިއުނާފް މަރުހަލާ ނިމިފައިވާކަމަށް ވެސް އިހްސާން ވިދާޅުވިއެވެ. އިހްސާން ވިދާޅުވި ގޮތުގައި 1954 ވަނަ އަހަރުގެ ފަހުން ރާއްޖޭގައި އަދި މިހާތަނަށް މަރުގެ ހުކުމް ތަންފީޒުކޮށްފައެއް ނުވެއެވެ.
މައުލޫމާތު ލިބޭ ގޮތުގައި އެންމެ ފަހުން ރާއްޖޭގައި މަރުގެ އަދަބު ދިނީ މުޙައްމަދު އަމީންގެ ވެރިކަމުގައެވެ. އެއީ ގއ. އަތޮޅުގެ އަތޮޅުވެރިޔާއަށް ވިހައެއް ދީގެން މަރާލި މައްސަލާގައި ހެދުނު ތަޙުޤީޤަށް ފަހު ކުށް ސާބިތުވި ފިރިހެނަކަށެވެ. އޭނާގެ މައްޗަށް މަރުގެ ހުކުމް ތަންފީޒުކޮށްފައިވަނީ މިހާރުގެ ވެލާނާ އިންޓަނޭޝަނަލް އެއާޕޯޓު ހުރި ހުޅުލޭގައެވެ.
