ރައީސް ޑރ. މުޙައްމަދު މުއިއްޒަށް ސިހުރު ހެދިކަމުގެ ތުހުމަތުގައި ހައްޔަރުކުރި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ޝަމްނާޒް ސަލާމް ދޫކޮށްލައިފިއެވެ.
ފުލުހުން ވިދާޅުވީ، މި މައްސަލައިގައި ހައްޔަރުކުރި، ޝަމްނާޒް ސަލީމާއި އޭނާއާއި އޭނާގެ ކޮއްކޮ މިއަދު ބަންދުން ދޫކޮށްލާފައިވާ ކަމަށެވެ.
ސިހުރު ހެދިކަމަށް ތުހުމަތުކުރާ މައްސަލައިގައި ޝަމްނާޒު އާއި އޭނބާގެ ކޮއްކޮ ހިމެނޭހެން އަދި އިތުރު މީހެއްވެސް ވަނީ މިދިޔަ މަހުގެ 23 ވަނަ ދުވަހު ހައްޔަރުކޮށްފައެވެ.
އެންމެ ފުރަތަމަ އެ ދެ މީހުން ހައްޔަރުކޮށް ބަންދަށް ހަތް ދުވަސް ޖެހިއެވެ. އެއަށްފަހު އަލުން ކްރިމިނަލް ކޯޓަށް ހާޒިރުކޮށް ބަންދުގެ މުއްދަތު ވަނީ އިތުރުކޮށްފައެވެ.
ސިހުރު ހެދިކަމަށް ތުހުމަތުކުރާ މައްސަލައިގައި ޝަމްނާޒު ވަނީ ސްޓޭޓް މިނިސްޓަރުކަމުން ސަސްޕެންޑު ވެސް ކޮށްފައެވެ.
ޝަމްނާޒްއަކީ ރައީސް އޮފީހުގެ މިނިސްޓަރު އާދަމް ރަމީޒުގެ ކުރީގެ އަނބިކަނބަލުންނެވެ.
އެންވަޔަރަމަންޓު މިނިސްޓްރީގެ ސްޓޭޓް މިނިސްޓަރަކަށް ޝަމްނާޒް އައްޔަން ކުރުމުގެ ކުރިން އޭނާ ހުރީ، މުލިއާގޭގެ ސްޓޭޓް މިނިސްޓަރުކަމުގައެވެ.
