ތޫނު ހަތިޔާރާއެކު މާލޭގައި ގްރޫޕް މާރާމާރީ ހިންގި ޒުވާނުންތަކެއް ހައްޔަރުކޮށްފިއެވެ.
ފުލުހުން ހާމަކުރެއްވި ގޮތުގައި މި މައްސަލައިގައި 5 ޒުވާނަކު ހައްޔަރުކޮށްފައި ވާއިރު އެ 5 މީހުންނަކީވެސް އުމުރުން 189 އަހަރާއި 24 އަހަރާއި ދެމެދުގެ މީހުންނެވެ.
އެގޮތުން މި މީހުންގެ ބަންދާއި މެދު ގޮތެއް ނިންމުމަށް ކްރިމިނަލްކޯޓަށް ގެންދިޔުމުން 2 މީހަކު ތަހުޤީގު މަރުހަލާ ނިމެންދެން ބަންދުކުރުމަށާއި އަނެއް 3 މީހުން 5 ދުވަހަށް ބަންދުކުރުމަށް ވަނީ އަމުރުކޮށްފައެވެ.
މި މީހުންގެ މައްޗަށް ކުރަނީ، ޖަމާއަތް ހަދައިގެން ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގި ކަމުގެ ތުހުމަތެވެ.
އެގޮތުން މި އެންމެން ބަންދުން ދޫކޮށްލައިފިނަމަ, މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް އެމީހުން ބަންދުކުރުމަށް ނެރުނު އަމުރުގައި ވެއެވެ.
ތަހުޤީގު ނިމެންދެން ބަންދުކޮށްފައިވަނީ ތ. ތިމަރަފުށީ ހުސްމުތީގޭ އިޝާމް އަހުމަދު (23އ) އާއި ށ. މަރޮށި، ހަވާ ސަދުޙާން އަހުމަދު ޒާހިރުއެވެ.
މި މީހުންނާ ދެކޮޅަށް ފުލުހުން ކޯޓަށް ހުށަހެޅީ ފުލުހުންގެ ބަޔާނާއި އިންޓަލިޖެންސް ރިޕޯޓާއި ހާދިސާ ރިޕޯޓުގައިވާ ތަފުސީލުތަކާއި ސީސީޓީވީ ފުޓޭޖާއި އެ ފުޓޭޖުގެ ސްނެޕްޝޮޓްތަކާއި އަނިޔާ ލިބުނު ފަރާތުގެ ފޮޓޯތަކެވެ.
