ގަވާއިދާ ހިލާފަށް ރާއްޖޭގައި އުޅޭ ބިދޭސީން ހޯދައި ފިޔަވަޅު އެޅުމަށް، ކަމާއި ބެހޭ އިދާރާ ތަކާއި މޯލްޑިވްސް އިމިގްރޭޝަން ގުޅިގެން ކުރިޔަށް ގެންދާ އޮޕަރޭޝަނަށް ހުރަސް އަޅައި ވެހިކަލަށް ގެންލުންދިން ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަންގެ ކޮންޓްރޯލަރ މުހައްމަދު ޝަމްއާން އެކްސްގައި ކުރެއްވި ޕޯސްޓެއްގައި ވިދާޅުވީ މި މައްސަލައިގައި އިމިގްރޭޝަންގެ ބެލުމުގެ ދަށަށް ގެނެވުނު ބިދޭސީ މީހާއާއި މެދު ވީ އެންމެ އަވަހަކަށް އިމިގްރޭޝަން ޤާނޫނުން ހަރުކަށި ފިޔަވަޅު އެޅުމަށްފަހު ޑީޕޯރޓް ކުރެވޭނެ ކަމަށެވެ.
https://x.com/ShamaanW/status/1812220931278024779
މީގެ އިތުރުން ޤަވާއިދާ ޚިލާފަށް އުޅޭ ބިދޭސީން ހޯދުމަށް ހިންގާ މި އޮޕަރޭޝަން ފަސް ޖެހުމެއް ނެތި އަދި ބިރަކަށް ސިހުމެއް ނެތި ކުރިއަށް ދާނެ ކަމުގެ ޔަގީންކަން ޝަމްއާން ވަނީ ދެއްވައިފައެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ބޮޑުވެފައިވާއިރު އިމިގްރޭޝަނުން މިހާރު ދަނީ ކޮންމެ ދުވަހުވެސް ޚާއްސަ އޮޕަރޭޝަންތަކެއް މާލޭގައި ކުރިޔަށް ގެންގޮސް ގަވާއިދާ ހިލާފަށް އުޅޭ ބިދޭސީން ހިފަހައްޓަމުންނެވެ.
