ފުލުހުން ތަހުގީގު ކުރަމުން ގެންދާ މަސްތުވާތަކެތީގެ މައްސަލައެއްގެ ތަހުގީގަށް ތިން މީހަކު ހޯދަން އެ އިދާރާއިން އިއުލާނުކޮށްފިއެވެ.
ފުލުހުންގެ ހޯދަން އިއުލާނުކޮށްފައިވާ ތިން މީހުންނަކީ، އީސާ ވަސީމް، ކ.ކާށިދޫ / ރިވެލި (37އ) ، މުހައްމަދު އިސްމާއީލް، ކ. ތުލުސްދޫ / ބްލޫވޭވް (48އ) އަދި އަހްމަދު ހޫދު، ސ. ހިތަދޫ / ސްޕަންޖްގެ (26އ) އެވެ.
އެގޮތުން މި ތިން މީހުން ހާޒިރުކުރަނީ، ފުލުހުންގެ ޑްރަގް އެންފޯސްމަންޓުން ތަހުގީގު ކުރަމުންދާ، މަސްތުވާތަކެތީގެ މައްސަލައެއްގެ ތަހުގީގަށް ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާތީ ކަމުގައި ފުލުހުންގެ އިއުލާނުގައި ވެއެވެ.
ވުމާއެކު، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން މި މަހުގެ 21 ވަނަ ދުވަހުގެ 12:00ށް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގ ނުވަތަ އެންމެ ކައިރީގައިވާ ޕޮލިސް ސްޓޭޝަނަކަށް ހާޒިރުވުމަށް ފުލުހުން އިއުލާނުގައި އަންގާފައިވެއެވެ.
އެ ފަރާތްތައް ހާޒިރު ކުރަނީ މައްސަލައިގެ ތަހުގީގަށް ސުވާލުކުރުމަށް ކަމަށް ފުލުހުން ބުނެފައިވެއެވެ.
